La Coordinadora Ecoloxista d’Asturies denuncia la presencia de turistes na islla’l Bornizal, que ye una zona d’usu acutáu de la reserva natural de la Ría de Villaviciosa. Toles autoridaes alieguen qu’escarecen de medios humanos pa comprobar los fechos y sancionar a los infractores

L’acampada llibre nun ta permitía n’Asturies. Muncho menos si se trata d’un espaciu perteneciente a una Reserva Natural  Parcial, como ye la ría de Villaviciosa, reconocíu na Llista d’Humedales d’Importancia Internacional polos sos destacaos valor ambientales  RAMSAR (Convención Internacional relativa a los Humedales d’Importancia Internacional), que ye Llugar d’Interés Comuñal (LIC), y Zona Proteición de les Aves (Zepa).

Na Islla ta prohibío inclusive entrar ensin autorización, daqué que resalvaron estos turistes, qu’ istalaron delles tiendes de campaña en plenu santuariu.

La inoperancia y la falta d’interés de les autoridaes quedó de relieve nel  particular percorríu de denuncies que siguieron los miembros de la Coordinaora: El Seprona diz que nun intervién al nun ser delitu penal. La Policía Municipal diz que nun intervién al ser cosa del “Principado”. El “Principado” almite que ye la so competencia, pero al nun tener guardería na ría dende va tiempu, dependen de la zona central, onde solo hai una guardia de fin de selmana (¿?) que taba “n’otres xeres” a decenes de kilómetros cuando se riquirió la so presencia.

Los ecoloxistes tarrecen que la impunidá de los infractores anime a otros a asonsañalos, yá que fueron miles les persones testigos de la invasión del santuariu d’aves.

Dende Andecha Ástur tamién unviaron un comunicáu amosando la so indignación énte esta invasión, nel que culpen de la situación a “les prioridaes del Principado”” denunciando “la so política de desidia col nuesu mediu ambiente y el sofitu d’un turismu xabaz, masificáu y de baxu nivel y rentabilidá”

Llucía F. Marqués

This work is licensed under a Creative Commons Attribution 4.0 International License.