Del 31 de Xunetu al 5 d‘Agostu tou xira alrodiu’l Jazz en Candás: conciertos, esposiciones, conferencies, talleres ya’l cursín añal d’improvisación musical
Músicos como Michael Lee Wolfe,Nothing to lose, Trébedes o Ilyia Levitin pondrán la música a Candás de magar el próximu llunes. Pero la Selmana del jazz nun ye solo una montonera conciertos de baldre, sinón que son 6 díes nos que les cais, chigres y centros culturales s’enllenen de música de la meyor, poniendo al branu candasín un ritmu prestosu.
Habrá una esposición de pintura, otra de semeyes, talleres, conferencies y, sobre tou, un gran ambiente musical. Esti añu, como novedá, tendremos “Jazz de cerca”: amás de les actuaciones del Escenariu central –na Plaza’l Bocata-, habrá pequeños conciertos “de cai” n’escenarios repartíos pela villa, peles tardes, de nueche o a la hora’l vermú. Tamién son dellos los hosteleros qu’acoyerán conciertos nos sos establecimientos, aparte de les avezaes “Jam Sessions” que surden ensin planificación al cayer la nueche.
Los deprendices tendrán tamién llugar, nel cursu d’Improvisación de la Selmana del Jazz, que tien dos versiones: pa reciella y p’adultos.
Redaición InfoAsturies
This work is licensed under a Creative Commons Attribution 4.0 International License.
