La Coordinadora Ecoloxista d’Asturies y l’organización política Andecha Ástur amosaron la so oposición a la creación d’una planta de xestión de basoria foriata en La Peral

La Coordinadora Ecoloxista d’Asturies y l’organización política Andecha Ástur amosaron la so oposición a la creación d’una planta de xestión de basoria foriata en La Peral

En  curtiu van presentase allegamientos al proyeutu, allugáu na llocalidá de La Peral, (Ribadeva), nel que se contempla la creación d’una planta pa tratar 113.000 tonelaes de residuos varios de calter metálicu de l’acería y fundición que la empresa caltién nel País Vascu y qu’enagora son procesaos na planta que tienen en Vizcaya.

Tratase d’una planta de tratamientu de residuos peligrosos y non peligrosos- provenientes de les aceríes del País Vascu, en concretu de la Mercantil Hierros y Metales Gutram S.l. que s’allugaría en mediu del nucleu de La Peral, a malpenes 20 metros de les viviendes y hoteles de la fastera col consiguíente impautu nuna zona urbana.

Mientres el tratamientu de los residuos metálicos d’aceríes y fundiciones xenérense abondes partícules contaminantes del aire y un importante nivel de ruíu, arriendes del fuerte impautu visual, al plantegase l’actividá nuna superficie de 10.000 m2 de los que cubiertos solo taríen 2.167.

“Ye propio de países tercermundistes encargase de los residuos producíos pola actividá –más rentable- desenvuelta n’otru llugar. La creación de puestos de trabayu n’Asturies nun puede pasar por convertinos nun basorieru.” Resaltó Arturu Xosé Bermeyu, Secretariu Xeneral d’A.A.

Pela so parte Fructuoso Póntigo, en nome de la C.Y.A, amuesa la so  indignación énte los argumentos de los que defenden el proyeutu “Atrévense a dicir nel proyectu que nun va haber contaminación del aire, cuando ye xusto lo contrario, el tratamientu de los residuos metálicos d’aceríes y fundiciones xeneren permunches partícules y munchu ruíu nel procesu, col consiguiente impautu nuna zona urbana con varios establecimientos hosteleros que xeneren numerosos puestos de trabayu, que se verán muy afeutaos por estos peligrosos vecinos”

Redaición InfoAsturies

This work is licensed under a Creative Commons Attribution 4.0 International License.