La precariedá llaboral y la escasez de docentes van marcar l’entamu’l cursu

  • 20 Xullo, 2017

El Sindicatu d’Enseñantes Asturianos, SUATEA, denuncia que’l porcentaxe de places a media xornada yá supera’l 32% y que son munchos los centros que van entamar el cursu ensin tener asignaos tolos profesores

La Conseyería d’Educación publicó la ufierta de places pal  prósimu cursu. Trátase de 2722 places que se destinen al profesoráu interín y que van ser axudicaes definitivamente’l 30 d’agostu. Esta cifra amuesa la grave situación de precariedá na que s’atopa’l sistema educativu asturianu: una bona parte los centros cunten con plantiyes inestables que cada cursu varien, colos perxuicios qu’eso supón para tola comunidá educativa.

Nesta convocatoria falten places asgaya, como les de los centros de persones Adultes, sustituciones para tol cursu o xubilaciones que tán previstes pa entamos de setiembre. Ello ye, qu’un cursu más el profesoráu interín nun va tener la oportunidá d’aportar a toles vacantes y los centros van tener qu’escomencipiar les clases ensin el profesoráu necesariu. Según l’alcuerdu d’interinos anguaño a valir nun se permite la meyora de puestu, una propuesta de SUATEA por que’l profesoráu pudiera aportar a les nueves places qu’ensin dulda van salir na viniente convocatoria.

A díi de güei son munchos los centros educativos siguen ensin tener rempuesta sobro les necesidaes de plantiya solicitaes polos equipos direutivos, polo que les direcciones vense obligaes a entamar el cursu ensin conocer la dotación esauta de les plantiyes. La Conseyería d’Educación escudase’n que va ser en setiembre, al zarru de les matrícules, cuando s’autoricen les necesidaes. El gran problema ye que’l zarru de matrícula realizase’l 7 de setiembre y el cursu entama’l díi 13. Esto torga que’l centru pueda ufiertar toles materies solicitaes pol alumnáu que si deseya cursar determinada materia rellacionada col so futuru académicu, vese obligáu a camudar de centru. La falta de docentes fai qu’haya profesoráu tutor qu’imparta una asignatura optativa y  poro que nun conoza a parte l’alumnáu y en primaria obligase al profesoráu especialista a desempeñar les tutoríes incumpliendo asina los alcuerdos de plantiyes.

L’abusu de les medies xornaes ye la consecuencia l’intentu d’afaer les plantiyes al mínimu. L’espoxigue d’esta triba de contratos precarios va medrando cada cursu. Nesta convocatoria’l porcentaxe de places a media xornada yá supera’l 32%, sobremanera n’Enseñanza Secundaria. La Conseyería impón la precariedá a un terciu del profesoráu que llogre plaza nesta primer convocatoria. Tratase d’una situación inadmisible que cursu tres cursu va convertiéndose en práutica avezada. Pa SUATEA ye imprescindible finar con esta situación d’inestabilidá y precariedá que ca añu empiora, axustar un nuevu alcuerdu d’Interinos que recueya la meyora de puestu y llograr que la convocatoria de les prósimes oposiciones docentes valga pa estabilizar al profesoráu interín.

Redaición InfoAsturies

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies