Les bandes de gaites de Llangréu y Villa de Xixón entamen sendos Campamentos d’averamientu a la Música tradicional
La llabor de les Bandes de Gaites tresciende del “simple” llabor de deprender a tocar la gaita en comuña y desfilando. Arriendes d’ello en cuasi toes alcontramos la posibilidá de tocar abondos más instrumentos –non solo, pero sobromanera de percusión- canciar, o baillar. Nun ye d’estrañar tampoco que dende les bandes se faigan investigaciones etnográfiques de recuperación musical o que se faigan actividaes coles qu’averar al públicu la música’l país. Esti añu son dos les bandes qu’entamen campamentos nesti sen.
La quinta edición de Tradicionando, cursu de branu de la Banda Gaites Villa de Xixón, ya ta en marcha dende entamos de mes y fasta’l 31 de xunetu. Ye de baldre y ta dedicáu a la reciella, con talleres de deprendizaxe de gaita, percusión y baille’l país. Dos díes a la selmana demientres tol mes los escolinos, d’ente 6 y 18 años, dediquen hora y media a conocer los fundamentos de la nuesa tradición adientrándose na música, nes dances y los bailles más populares del nuesu folclor. Los organizaores definen el cursu de branu como “Una esperiencia tresformaora pa conocete a ti mesmu, esplorar lo que te presta, collaborar y conocer l’impautu que prevoca dotar de sentíu a lo que depriendes”.
Per otru llau, del 24 al 28 de Xunetu Soto d’Agues ( Sobrescobiu) acueye un Campamentu d’Averamientu Tradicional de calter didáuticu y familiar nel que pás, más y neños tendrán la oportunidá de compartir 5 díes d’actividaes rellacionaes cola tradición musical asturiana.
Entamáu pola Banda Gaites Conceyu Llangréu , el campamentu adautará’l nivel al de los asistentes, ya seya en clases d’aniciu o d’afondamientu, abarcando estremaos instrumentos (pandereta, tambor, flauta, acurdión, percusión, y gaita), asina comu baille y canciu’l país. Esti campamentu cuenta con mayestros perconocios dientro la tradición musical asturiana, comu Ambás y Ramsés, especialistes en trabayu de campu, Dani Álvarez y Nel Sánchez, encargaos de les clases de flauta y acurdión diatónica o Ricardo Soberado y Manuel Durán, que van encargase de les asignatures de “Interpretación y afinación de la gaita” y “Interpretación y mantenimientu del tambor”. Dellos conciertos nuecherniegos completen les actividaes d’esti campamentu, que tien la modalidá residencial o esterna.
Llucía F. Marqués
This work is licensed under a Creative Commons Attribution 4.0 International License.
