El ministeriu español de Fomentu afirma que les obres van empecipiase en 2019

La nueva estación va construyise delantre del Muséu del Ferrocarril en 2024, según prometen nuevamente dende’l Gobiernu español. Les obres empezaríen en 2019 y sumando los plazos previos d’estudios y ellaboración de proyectu toles actuaciones necesaries pal soterramientu ferroviariu tardaríen en materializase alredor de «seis años y mediu».

El secretariu d’Estáu d’Infraestructures y presidente de “Gijón al Norte”, Julio Gómez-Pomar, dempués d’una xunta del conseyu d’alministración, prometió tamién una nueva etapa nel desendolcu del principal proyectu ferroviariu que tien pindiu la ciudá dende hai 15 años: el polémicu y faraónicu metrotren. Una xunta na que Fomentu, Principáu y Conceyu aprobaron conxuntamente la reformulación financiera del plan de víes que, sofitada por una aportación a xeitu perdíu de 140 millones del Gobiernu español, garantiza la execución de les obres ensin depender como hasta agora de la especulación coles parceles del ‘solarón’.

El nuevu repartu de les obligaciones económiques de cada alministración va quedar afitáu nun nuevu conveniu que van roblar los trés socios nos vinientes meses y que va sustituyir al de 2002, vixente dende la creación de “Gijón al Norte”. El costu envaloráu del nuevu plan de víes ye de 475,87 millones d’euros de los que tán pindios d’executar 403,51 millones.

This work is licensed under a Creative Commons Attribution 4.0 International License.