La contaminación por bencenu -presuntamente procedente de les bateríes d’Arcelor- medró un 950 % en Llaranes esti martes, mientres que n’Avilés se dispara nuevamente la contaminación por partícules
La Coordinadora Ecoloxista d’Asturies considera que nos alcontramos nun nivel de contaminación tan eleváu que xustifica la declaración del estáu d’alerta por polución. Alvierten tamién de la mayor peligrosidá d’esti problema por mor de les altes temperatures y ofrecenmos un analís detalláu de la situación de caún de los principales contaminantes:
Bencenu
Esti hidrocarburu poliinsaturáu ye reconocíu como causante de dellos problemes físicos, incluyendo la lleucemia. Per otru llau, la so alta inflamabilidá fai medrar el riesgu d’incendios y españíos.
La estación de Llaranes presento ayeri a la una un picu de 19 µg/m3n , siendo 1,7 µg/m3 de media tolerable pal ser humanu acordies la O.M.S
PM2,5
El tamañu de les micropartícules de menos de 2,5 micres permite-yos entrar nel sistema respiratoriu, causando abondes ya importantes problemes respiratorios.
N’Asturies nun cuntamos más que con dos midiores d’estes partícules, la de Castrillón y la de Corvera, les 2 fuera de güei como ayeri, rexistrándose los mayores picos a la mesma hora que’l de bencenu.
PM10
Estes micropartícules son daqué mayores que les 2,5, pero entá peligroses pal sistema respiratoriu.
N’alarma por esta triba de contaminación sigui n’Avilés con picos de 147 µg/m3, y una media de les últimes 24 hores de les PM10 de 109 µg/ m3 , na escondía estación de Valliniello a cuyos vecinos deberíen alvertir del pelligru que soporten, pero fuera de rangu tenemos toles estaciones del conceyu (Valliniello, Quirinal, Maruca, Arobies y Avenida Xixón). Tamién Gozón tien toles estaciones fuera de rangu (Santiago d’Ambiedes, Antromero, y la del Faru).
N’alerta por contaminación sigui Corvera con 2 estaciones fuera de rangu, igual que les tres estaciones de Castrillón (Salines, Espartal, Arnao)
Ósidos de nitróxenu
Espectacular el datu de NO na escondía estación de la Marzaniella en Corvera con una media de les últimes 24 hores de 224 µg/m3
l’actual recomendación de la OMS ye nun superar la media de 20 µg/m3 pa protexer a la población de los efeutos nocivos pa la salú del NO2 gaseosu.
Toos estos datos, recuerden dende C.E.A., acordies a los escasos datos que facilita’l Gobiernu d’Asturies na so web, ya que nun apurren datos en continuo de les estaciones privaes y camuden l’allugamientu de les publiques buscando les que den valores más baxos.
This work is licensed under a Creative Commons Attribution 4.0 International License.
