• Portada
  • >
  • Opinión
  • >
  • La Carrera de la muyer ya’l reclamu del universu rosa

La Carrera de la muyer ya’l reclamu del universu rosa

  • 19 Xunu, 2017

Esti  domingu cellebróse’n Xixón, como ya vien siendo vezu, la Carrera de la Muyer. 8.000 presones corriendo  5,5 Km“con bon rollu” pa financiar pente  toos la llucha escontra’l cáncanu de mama

Esti yera l’añu trece de la Carrera de la Muyer y yo tenía, milagru, el díi llibre, asina que dixi, ¿Por qué non? Cinco km y mediu corriendo en bloque’l díi más calorosu del sieglu nun tien porque ser un mal plan, si la concienciación contra’l cáncanu de mama, la llucha contra la violencia de xéneru y fomentu de la práutica esportiva femenina son los enfotos…

Reconózolo, tantu rosa  -camiseta Oisho megafashion-ya me daba perceguera dende l’entamu y lo escrito nun aidaba “Hoy ganan las chicas” ¿güei namás? Que pelligru… eso si, lo del dorsal 016 (teléfonu d’atención a les víctimes de maltratu nel llar)abultóme un detalle bien pensáu.

Anantes d’entamar, garro con xeitu “la bolsa de la corredora “, rosa,  na que cuento alcontrar agua, barrines enerxétiques ya eses cuestiones d’avituallamientu avezaes pa la prautica esportiva. Pues non, el pack trai fasta diez productos  “sanos y naturales”, por supuesto baxos en caloríes o direutamente adelgazantes, daqué tan útil pa una carrera  como aceite d’oliva virxen, mayonesa y colacao 0% materia grasa y  tres bolsines de fervinchos. Como non, imprescindible en toa concentración femenina, recibo tamién dos revistes del corazón ( ¿?)

Anantes de la salida, un poco musiquina y unos baillinos, lo más normal, anantes d’una  preba d’atletismu, ¿non?. Salgo tres  la “marea rosa”. Les cámares busquen la semeya : “Una sonrisa al pasar l’arcu” siento dicir al aportar a la meta “Que sal en Cosmopolitan, la tele de les muyeres qu’encanten a los homes”. Nun doi créditu. Menos mal que, pa recuperame, danme un botellín, rosa, d’agua. Darréu, un pocu de Zumba, fitness  y eses cosines de muyeres. A esi altor del tema ya me quedara nidio qu’en cuantes a estereotipos díbemos sobraes.

“Igual tenies qu’habelo maxinao mirando los patrocinaores”, dizme una collacia, asina qu’echo una güeyada. Xunto a la Central Llechera Asturiana -mui propio, la verdá- alcuentro otra riestra de marques que nun voi repetir equí, pero qu’incluin cinco de productos “lights”, dos clíniques “d’embellecimientu” y la FEDA, Federación Asturiana d’aerobic. Si, agora pescancio meyor dalgunes coses. Nun pueo dexar de  posar la vista nun de los copatrocinaores, DKV seguros mélicos, polémicu por refugar como nueves clientes a enfermes de cáncanu de mama.

Bono, digo como pa min, qu’importa, si lo que cuenta son esos diez euros qu’acabo donar pa la llucha escontra’l cáncanu… Ah ¿qué non?  ¿Qué pa eso va menos d’un Euru? ¿entós?. entós va ser que pal lluchar escontra’l cáncanu meyor pongo la camiseta de sanidá pública y reclamo una asistencia sanitaria de calidá pa toos y pa toes na próxima mani.

Siéntome estafada, triesti, incluyía con trampes nun eventu macropublicitariu, sesista y manipulaor. Camín de casa tiro la bolsina rosa de la corredora. Coime, que mal tastu dexa tanta fartura de rosa.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies