La reciente multa impuesta a  la escuela por tocar la gaita na cai nun torgó que’l conciertu fore al aire llibre

La Plaza d’Italia, en Xixón, foi la ubicación escoyía pa facer un conciertu de más de dos hores col que La Escuela Tradicional de Música Villa de Xixón preslló un cursu cargáu de música’l país. Más de cien escolinos musicales d’edaes bien estremaes pasaron pel improvisáu escenariu a facer gala de lo deprendío.

[cycloneslider id=”villa-de-xixon”]

Si la banda gaites, na so duple versión (reciella/mayores) ye quicias la estaya de la escuela más conocía, nun ye, con muncho la única. Vigulín, guitarra, bouzouki, pandereta, travesera,  percusión… son dellos los instrumentos que se deprenden a tocar a la manera tradicional en Villa de Xixón, ensin escaecer el prestosu grupu de baille. La Banda Gaites Jovellanos foi’l grupu convidáu qu’acompangó nes actuaciones de gaita.

El llabor d’esta triba d’escueles tien una importancia descomanada, non solo na formación de músicos sinón nel espardimientu y caltenimientu de la nuesa tradición, asina como la gran responsabilidá de respetar y sofitar la nuesa cultura.

Güei cellebra tamién el so fin de cursu la otra gran escuela de música tradicional de Xixón, La Quintana. Sedrá nel Muséu del  Pueblu d’Asturies y tamién sedrá abierta a l públicu.

This work is licensed under a Creative Commons Attribution 4.0 International License.