El “Principado” autoriza l’arranque masivu d’ocle

  • 16 Xunu, 2017

Ensin cuntar cola opinión de los espertos, decidieron priorizar esta práctica sobro la de corte de les plantes, muncho menos dañible, o la tradicional recoyida d’arribada del ocle qu’arranca la mar, inocua dafechu

La Conseyería de Desendolcu Rural y Recursos Naturales, al traviés de la Dirección Xeneral de Pesca Marítima, acaba de dar  lluz verdi a la estración por arranque d’algues de fondu del xéneru Gelidium (ocle).

La teoría de la Dirección Xeneral de Pesca Marítima ye que col  arranque de raigañu “les plantes crecen más” y sobro toles especies que s’abelluguen nes praderíes d’algues, afirma que “cuando s’arrinque les algues ameyorarán les especies esistentes”. Sicasí nun apurre nengún tipu d’estudiu o desplicación qu’avale estes informaciones, entantu que dende va años el Centru d’Esperimentación Pesquera defendi como menos malu’l métodu de corte, frente al arranque de les praderíes d’ocle, yá que tien la ventaxa de caltener intautu’l sistema de fixación de la planta, asegurando la so pervivencia y dexándola en condiciones óptimes pa que rebrote. Arriendes d’ello l’altor del corte puede ser escoyíu, respetando los exemplares de menor talla y cortando a partir del altor onde se concentra la mayor parte de biomasa, acordies con la morfoloxía del ocle.

Les praderíes d’algues marines son fundamentales como hábitats marinos, zona d’asentamientu llarval y abellugu contra la depredación pa diversos invertebraos, d’ende la so importancia nel xorrecimientu y desendolque de los pexes na so primer etapa.

La midida va afeutar sobremanera a la mariña oriental asturiana, onde’l productu tien más calidá y la so cantidá ye enagora mayor. El “Principado”” envalora que por arribazón, métodu nel que l’impautu ambiental lléndase al del pasu de tractores sobro’l sable, recuéyense 3.000 tonelaes al añu, cantidá que se va ver amenorgada pol arranque d’exemplares.

Hai que remembrar que na nuesa plataforma costera yá se ta percibiendo un significativu amenorgamientu de la biomasa forestal marina nesa fastera, frutu de la presión pesquera y l’aumentu significativu de la temperatura del agua.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies