Hamilton gana ensin complicaciones en Canadá

  • 13 Xuño, 2017

Mercedes preslló un fin de selmana perfeutu con pole p’Hamilton el sábadu amás d’un record de vuelta impresionante y doblete nel podiu’l domingu con un paséu bastante tranquilu pa dambos coches. Red Bull algamó’l tercer puestu con Ricciardo, anque’l so compañeru nun tuvo la mesma suerte teniendo qu’abandonar nuna carrera que se-y taba dando bien.

L’entamu de carrera foi desastrosu. Verstappen, que salía quintu, pasó a 3 coches nún d’esos movimientos arriesgaos que tamos avezaos a ver nel xoven pilotu de Red Bull y qu’esta vegada salio-y perbien. Vettel cayó a la cuarta posición y ente tantu Hamilton, que siguía primeru, tenía ya la victoria na so mano.

Un poco más atrás el madrilanu, Sainz, tocaba ensin querer a Grosjean. Esto fizo que perdiera’l control del so coche completamente, desembocando nel accidente que-y costaría la carrera a Massa ensin comelo nin bebelo.

Na vuelta 3 Vettel entró a cambiar el morru que tenía dañáu depués del toque con Verstappen na salida y dedicó’l restu la preba a tratar d’adelantar pa ganar la mayor cantidá de puntos posibles pal mundial nel que de momentu va primeru.

Llucha pola tercera posición: Red Bull, Force India y Ferrari

Depués del abandonu de Verstappen, la llucha poles 2 primeres posiciones yera inesistente pol dominiu de Mercedes nesti GP. Lo interesante d’esta carrera foi la llucha pol últimu puestu del podiu. L’actuación de Ricciardo col so Red Bull foi bastante buena y práuticamente nun dio tregua a los sos persiguidores, pero tanto los dos Force India como los dos Ferrari trataron d’algamar esa posición como fuera. Vettel diba séptimu y paez que les ordenes d’equipu ficieron que pasara a Kimi pa poder persiguir a los Force India que nesta carrera ficieron una actuación espectacular.

Ya falamos varies vegaes d’ello nesta temporada pero ye que l’equipu indiu ta desatáu. Tienen un presupuestu pequeñu comparao col de Mercedes, Ferrari o Red Bull pero tan consiguiendo lluchar con ellos. De toles maneres, la potencia del Ferrari fizo que Vettel llegará y pasará tanto a Ocon como a Pérez.

 

Pela parte del mediu, l’abandonu de Kvyat dio-y al carbayón Fernando Alonso la oportunidá de tar décimu y algamar el primer puntu de la temporada pal so equipu. La cosa pintaba perbien, pero a dos vueltes del final el motor Honda dixo basta. Si, paez mentira pero otru “engine failure” (fallu de motor) fai que McLaren siga siendo l’únicu equipu ensin puntos del campeonatu. El cambiu de motor pa la prósima carrera, amás, supondrá una sanción pal asturianu que probablemente tea que salir últimu en Bakú.

Como siempres, recordáivos que podéis siguir l’actualidá del mundiu’l motor y la Fórmula 1 na cuenta de twitter @F1Nast

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies