Depués del A.V.E. ya’l Metrotren aporta a les nueses vies una nuea obra faraónica ensin final ciertu: el soterramientu de les víes de FEVE al so pasu per Llangréu

Pasaron ya más d’ocho años dende l’aniciu d’unes obres que teníen un plazu d’execución de dos años y mediu, ya’l gran proyeutu urbanísticu de modernización de la rede ferroviaria de la cuenca’l Nalón sigui siendo namás qu’eso, unes obres entamaes.

Pel camín, eso si, el presupuestu medró a bon ritmu: partiendo d’un presupuestu de 54 millones en 2.009, financiaos con cargu a los fondos mineros, agora calcúlase que pa cuando les obres ten finaes costaríen alrodiu’l doble. Fasta agora, el “Principado” ye quien ta adelantando les perres pa pagar la obra, tras la supresión de los fondos mineros, en concreto esti añu saldrán de les arques asturianes 6,3 millones pa continuar con estos trabayos.

La primer parte’l plan, el falsu túnel de la estación, probablemente te fináu a finales d’añu, pero istalar les víes, la catenaria, la señalización ya urbanizar los terrenos lliberaos, como taba previsto, va tener qu’esperar un poquiñín… nun hai fondos destinaos a ello, cenciellamente, nun queda presupuestu. Asina que nunos meses habrá nuéu sitiu pal pasu de los trenes, pero ensin víes, lo que dexa bastantes dubies so la meyora del serviciu que podrán dar a los usuarios: el túnel tará ellí, pero los trenes siguirán pasando per onde siempres.

La presidencia del Alministrador d’Infraestructures Ferroviaries (Adif), ta evaluando la obra pa decidir si se fai cargu de los trabayos comprometiéndose a dar una rempuesta anantes del  mes d’agostu. Una bones que se consigan los fondos, nel meyor de los casos, les obres pendientes llevaríen otros dos o tres años, polo menos fasta’l 2020, coles consiguientes molesties pa los vecinos de la fastera, que ya se manifestaben el mes pasáu pa desixir el fin de les obres y un serviciu ferroviariu de calidá. Por agora l’enfotu’l “Principado” paez tar más nel llanzamientu d’obres a llarguísimu plazu que n’ufrir un tresporte públicu afayaizu pa les necesidaes de comunicación de los asturianos.

This work is licensed under a Creative Commons Attribution 4.0 International License.