El Comité Ciudadanu Anti-SIDA d’Asturies realiza la prueba rápida de VIH a toa aquella persona que la solicite, por aciu cita previa, nel so llocal de la cai Ramón y Cajal de Xixón
N’ Asturies el primer diagnósticu d’un síndrome d’inmunodeficiencia adquirida realizóse n’agostu de 1985, anque la primer seroloxía positiva ye previa: de marzu de 1985. De magar, l’alarma permanez prendía y les campañes de prevención, información y detección asocédense, tantu para evitar na midida de lo posible l’apaición de nuevos casos como para asegurar a los enfermos la meyor calidá de vida, franciendo col estigma y la discriminación a los que dio llugar la desinformación anicial sobro la enfermedá.
Entá asina, más de la metá de los nuevos casos d’infección por VIH en Asturies detéctase tarde, envalórase qu’ente’l 25 y el 30 per cientu de les persones que viven con VIH desconocen que son portadores del virus, lo que trai un mayor deterioru del sistema inmunitario del afeutáu y un peor pronósticu, de la que xorrez el riesgu de tresmitir el virus a otres persones.
Ye por ello qu’El Comité Ciudadanu Anti-SIDA d’Asturies, asociación ensin ánimu d’arriquecimientu que defende y llucha polos derechos de les persones viviendo con VIH/SIDA, ufre la realización, de manera anónima y de baldre, d’una prueba rápida, que se realiza en fluyíu oral y apurre una rempuesta fiable nunos 20 menutos.
Mientres el procesu de realización de la prueba, que se fae nel llocal de l’asociación, na cai Ramón y Cajal, 39, de Xixón, úfrese asesoramientu acerca de la mesma y derivación y acompañamientu al centru sanitariu correspondiente nos casos reactivos. Tamién s’apurre material preventivo ya informativo pa promover futures práutiques segures.
P’aportar al serviciu de prueba rápida, tien de solicitase cita previa llamando o dexando mensaxe en contestador o WhatsApp a los númberos 985 33 88 32 / 684 62 83 37 o na páxina web de l’asociación, unviando un mensaxe dende’l formulariu de contautu .
Llucía F. Marqués
This work is licensed under a Creative Commons Attribution 4.0 International License.
