El “Principado” apreba l’autorización ambiental d’una planta de desguace de barcos nel puertu’l Musel ensin retrucar a les alegaciones de los grupos ecoloxistes

Un desguace d’estes carauterístiques atraería fasta’l puertu de Xixón un bon númberu de barcos antiguos, contaminaos y contaminantes, provenientes de toa Europa, convertiendo’l Musel nun vertederu naval de terceros países.

Los procesos de descontaminación de barcos xeneren de forma avezada abondantes vertíos de sustancies contaminantes ya’l fechu de que se pretenda realizar una parte del desmantelamientu na mar, fae más difícil la contención de los pequeños residuos, lo que xeneraría un efeutu acumulativo de contaminación del agua, perxudicando a la fauna marina y repercutiendo tanto nes actividaes de pesca como na calidá de les playes.

Nun puede escaecese tampoco la elevada contaminación acústica que careceríen los vecinos de la fastera ni’l pelligru que representa l’acumulación de sustancies inflamables y nocives al par d’una actividá na que, como ye’l casu los desguaces, son avezaos los incendios.

Poro, ye primordial cuntar con un  estudiu esaustivu de los posibles efeutos d’esta planta, asina como de l’acumulación d’impautos producía pola cercanía d’otres empreses contaminantes y peligroses nel mesmu área.

Pesi a que la normativa europea pide tener en cuenta les alegaciones presentaes, el proyeutu recibió ‘l vistu buenu por parte’l “Principado” ensin que mediara denguna rempuesta a les mesmes tras dos años de magar la so presentación. El “Principado” tampoco obligo a la empresa al perceutivu  trámite d’aceutación social del proyeutu, acordies colo  afitaonel Conveniu so l’acesu a la información, la participación del públicu na toma de decisiones y l’acesu a la xusticia en materia de mediuambiente, ratificao el 15 d’avientu de 2004.

Llucía F. Marqués

This work is licensed under a Creative Commons Attribution 4.0 International License.