La banda carbayona de folk/rock ta a piques de llanzar el so nueu discu, “A suitcase full of dreams”, con un sosprendente single del mesmu entítulu nel qu’entemecen con xeitu los idiomes asturianu ya inglés
El 21 de xunu, coincidiendo col Solsticiu de branu ya’l Díi Européu de la Música, Stormy Mondays llanzará el so nuéu discu: “Suitcase Full Of Dreams”, sosprendente por dellos motivos. Arriendes de mecer con ésitu dos llingües nel so single, el discu mesmu tien un formatu sosprendente, que combina la música dixital y l’analóxica nel mesmu soporte: el Compact Vinyl.
Per un llau, lleva un canciu en vinilu, aptu pa reproducir nun tocadiscos y pel otru tol discu en CD. La edición ta numberada a man y llendada a 500 exemplares. La so música puede descargase ensin problemes de la rede, ya qu’esti grupu ye pioneru de la distribución musical por interné (dende 1996) y les llicencies Creative Commons.
La banda, que garra’l so nome d’un clásicu del blues, “They Call It Stormy Monday”, de T-Bone Walker,(1947) defínese la so música como “canciones de verdá con istrumentos de verdá”: guitarra, pianos, Hammond, sección de vientu, cuerda, percusión, armónica o mandolina, alrodiu de 20 istrumentos suben al escenariu nos sos conciertos de la man de los ocho músicos que componen la banda “Tocamos folk rock. ispiraos pola lluvia y les montañes d’Asturies, alcontremos un soníu propiu, clásicu y moderno al tiempu: una orixinal mezcla d’Americana, Soul, rock británicu de los ’60 y folk asturianu”.
La so trayeutoria –con 15 discos grabaos- llevólos ya a lo más alto: el so canciu “Sunrise Number 1” foi escoyía pola NASA pa sonar nel espaciu. Y del universu, a los escenarios asturianos, pasando por Woodstock ’99 y tocando con dalgunos de los grandes, comu Springsteen y Slash.
Llucía F. Marqués
This work is licensed under a Creative Commons Attribution 4.0 International License.
