La Confederación Hidrográfica del Cantábricu archiva l’espediente sancionaor contra CADASA y l’Ayuntamientu d’Uviéu, entantu siguen produciéndose vertíos d’agües residuales nel ríu Nora

Col preslle l’espediente tantu’l Consorciu pal Abastecimientu d’Agua y Saniamientu d’Asturies (CADASA) comu l’Ayuntamientu d’Uviéu, llíbrense de la sanción de 74.043 euros  a la que s’enfrentaben por neglixencia na contaminación continua d’agües.

Los vertíos d’agües residuales al calce del ríu Nora proceden d’un coleutor municipal del sistema xeneral de Saniamientu allugáu na Corredoria -denunciáu dende la Coordinadora Ecoloxista d’Asturies en delles ocasiones-  y son perceutibles –visible y olfativamente- dende la sienda paralela al coleutor del ríu Nora.

El primer puntu de vertíu alcuéntrase a l’altor del Conceyín de la Corredoria y los vinientes al altor del Molín Casuca y de la Corredoria Baxa, zones de costruciones recientes y teóricamente  dotaes de l’afayaiza rede de coleutores faza la vecina depuraora de Villaperi, recientemente ampliada.

La C.E.A denuncia qu’estos fechos suponen un delitu por parte l’Ayuntamientu d’Uviéu acordies a la Llei Orgánica 10/1995 al suponer estos vertíos un riesgu grave pal equilibriu de los sistemes naturales.

Los vertíos d’agües residuales ensin depurar n’Asturies son un problema ambiental qu’incumple la normativa europea, recoyía na Direutiva 91/271/CEE, qu’obliga dende 2.005 a los núcleos grandes de población a tener les agües depuraes. Millones d’euros de fondos europeos foron gastaos n’obres de coleutores, depuraores y obres hidráuliques, pero Asturies sigue regada de puntos negros onde’l Saniamientu nun pasa de ser un canon cobráu a los vecinos.

Llucía F. Marqués

This work is licensed under a Creative Commons Attribution 4.0 International License.