Andecha Astur lleva’l 25 Mayu a la Xunta Xeneral

  • 26 Mayu, 2017

La propuesta rializada pola formación nacionaliega nel 209 aniversariu de la declaración de Soberanía pretende qu’ésta  asuma los fechos hestóricos y los conteníos políticos del 25 Mayu de 1808.

Nel escritu presentáu na Xunta Xeneral del “Principado”, Andecha Astur espón que “siendo conocíos los fechos acaecíos en 1808 nos que baxo la presión del pueblu asturianu la Xunta Xeneral del Principáu declárase Xunta Suprema, y reconoz la soberanía popular asturiana, xurando caún de los sos componentes que’l “poder, tol poder, reside y procede del pueblu”, y declarando en consecuencia la soberanía ya independencia d’Asturies, no que costitúi’l primer actu d’autodetermín d’Asturies na dómina contemporánia” y que  yá que l’actual Xunta Xeneral del “Principado” se pretende “continuadora d’aquella, por más qu’enxamás se mos permitiera al Pueblu Asturianu la posibilidá de llexitimala o non en referendum, siéndosemos impuesta dende Madrid”, propónse que la propia Xunta Xeneral “asuma los fechos hestóricos y los conteníos políticos d’aquel 25 mayu de 1808, aprebe una resolución afitando que la soberanía reside nel Pueblu Asturianu y oficialice la cellebración istitucional d’esta fecha como espresión y reivindicación del drechu a decidir que mos correspuende como Pueblu”.

Pa evitar males interpretaciones, Arturu Xosé Bermeyu, Secretariu Xeneral d’Andecha Astur,  desplica que lo que se ta faciendo nun ye sofitar una fecha alternativa pa la cellebración del Díi de la Nación Asturiana, un alderique que considera inrelevante “Asturies ye una nación con una hestoria tan bayurosa que sobren díis simbólicos pa festexar la nuesa identidá nacional”, sinon que lo que se fai, amás de reivindicar los fechos hestóricos ye “salir al pasu de quienes pretenden presentar esta fecha como alternativa al 8 setiembre  namás pol calter llaicu de la mesma, en comparanza col usu relixosu que del 8 setiembre se fai dende’l “Principado”. Reivindicar el 25 Mayu escaeciendo que ye’l primer actu d’autodetermín d’Asturies na dómina contemporania, y que nelli se reconoz espresamente que la Soberanía reside nel Pueblu Asturianu ye polo menos tan grave como facer del aniciu del Reinu d’Asturies una festividá relixosa”.

“Que los gobiernos del “Principado” PSOE-IU principalmente sofitaren una interpretación relixosa del 8 setiembre desplícase pol enfotu del españolismu en “desnacionalizar” el mesmu Díi de la Nación Asturiana, pero lo que tan pretendiendo agora mesmo los que proponen el 25 Mayu como fecha alternativa dando por bonu’l remanamientu relixosu del fechu hestóricu del aniciu del Reinu d’Asturies y plantegando una fecha “llaica”, pero despoxándola de los sos conteníos nacionales, ye cuasique más grave” afirmó’l Secretariu Xeneral d’Andecha Astur.

Per otru llau, hai de remembrar que coincidiendo con esta fecha, el 25 Mayu, Andecha Astur cellebrá esti sábadu 27 el so XX Díi d’Andecha con estremaos actos ente los que destaca un actu d’homenaxe al 25 Mayu de 1808 cola colocación d’un ramu lloréu a les puertes de la Sala Capitular onde tuvo llugar la mencionada declaración de Soberanía.

This work is licensed under a Creative Commons Attribution 4.0 International License.

1 Comment Already

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies