La Coordinadora Ecoloxista d’Asturies denuncia’l camuflaxe de numberosos vertederos d’escombros como “rellenu pa llantáu de pumares”
A pesar de les alegaciones presentaes pol impactu ambiental deriváu del mesmu, la Comisión d’Asuntos Ambientales del “Principado”, en comuña col Ayuntamientu de Corvera, vien d’autorizar la creación d’un nueu vertederu en Cancienes (Corvera), tramitáu como un “tarrén pa la implantación d’esplotación de pumar de sidra de Monte Escuru”.
Nun ye la primer ocasión en la qu’un proyeutu de vertederu d’inertes s’anuncia como esplotación agrícola: na mesma fastera y a bien pocos metros, tramitase l’ampliación del vertederu d’inertes de Monte Grande, qu’acumula delles denuncies por irregularidaes y a unos pocos kilómetros tramítase l’ampliación del vertederu del Cotarón (Carreño). “Menudo coladeru que son les alministraciones, cambien pumarada por vertederu, mañana una central nuclear cuelennosla como una churrería” ironiza sol’asuntu Fructuoso Póntigo, de la C.E.A
Esti nuéu vertederu ta aprebáu pa una capacidá anicial de 1.490.209 m3 que van ocupar 175.000 m2 de superficie. L’altor estimáu del rellenu ye de 38 metros. El“Principado” alega qu’esti proyeutu “nun tendrá efeutos significativos so’l mediu ambiente más allá de los ya evaluaos y analizaos na citada documentación”
Ye cierto que’l PGO de Corvera almite l’asignación pa vertederos de suelos degradaos o antigües canteres, lo que nun ye’l casu al ser una pradería en perfechu estáu. l’impautu paisaxísticu sedrá fuerte y sedrá visible dende les llocalidaes de Cancienes y Solis.
Llucía F. Marqués
This work is licensed under a Creative Commons Attribution 4.0 International License.
