Diversión, llibros y deprendizaxe nuna nueche perespecial, na que los rapacinos comparten el colexu con dalgunos de los sos presonaxes lliterarios favoritos

Los escolinos de los caberos cursos del colexu Atalía tienen cada añu la oportunidá de pasar una  nueche pente llibros, acompangaos polos sos presonaxes. Esti ye’l cuartu añu qu’esta orixinal actividá lleva a los rapacinos a vivir en primera persona aventures  sacaes de noveles a traviés d’una gymkana lliteraria nuecherniega.

Esti añu’l llibru escoyíu por María Vázquez, organizaora de la gymkana lliteraria, foi’l del famosu detective surdíu del maxín d’Arthur Conan Doyle: toa una esperiencia pasar la nueche resolviendo casos nos pasiellos del cole, tresformaos nos principales barrios de Llondres, de la man de Sherlock Holmes. Nos años anteriores los neños y neñes conocieron a los héroes de la Odisea, la escuela de maxa d’Harry Potter y les andances de Don Quixote de la Mancha nun prestosu camín d’averamientu a la lliteratura.

Ye tal l’ésitu de la iniciativa qu’esti añu otros dos colexos, el Príncipe d’Asturies y el Cervantes, tuvieron la so propia Nueche na biblioteca, con un total d’alrodiu de doscientos escolinos implicaos.

Llucía F. Marqués

This work is licensed under a Creative Commons Attribution 4.0 International License.