¿Quién nun remembra’l “Canciu d’amor” de Dixebra? Ya nelli la banda de rock avilesina proclamaba’l so amor pola bébora’l país, representáu agora en cerca de cuarenta y dos caxes de sidre etiquetaes pa la ocasión
De la collaboración pente Dixebra y Fanjul sal a la cai una edición mui especial d’una tirada de Sidra de 500 botelles, personalizada y esclusiva. Na so etiqueta, diseñada pol diseñaor uvieín Eduardo Carruébano, distínguese’l llogu del XXX Aniversariu, ya incluise tamién un retayu de la lletra del cantar «Canciu d’amor», ún de los más conocíos de Dixebra y nel que falen de la so querencia pola sidra
Estes botelles conmemoratives nun van ser puestes a la venta, sinón que van distribuyise de baldre pente colleutivos y persones qu’a lo llargo d’estes tres décades d’actividá ininterrumpida –dende’l ñacimientu de la banda nel 1.987- collaboraron col grupu o apoyaron el so llabor.
Entantu, la xira Tour 87-17, continúa llevándolos a tocar per bona parte de la xeografía asturiana. Depués d’actuar en Valles (Piloña), Mieres, La Felguera, La Pola Siero, Bárzana (Quirós), Ribeseya y (Llanera), van aportar nel mes de xunu a Comillas (Cantabria), Xixón (Conciertu pola Oficialidá), Tresona (Corvera) y Valmorí (Llanes).
Nesti intre’l grupu ta trabayando nel videu-clip del cantar «Sigue’l tren», onde se combinen imáxenes d’animación con otres reales. Esti videu ye’l primeru del proyeutu “Dalgo nuevo, dalgo vieyo, dalgo emprestao,” dirixíu pol xixonés Javier Lueje.
Redaición InfoAsturies
This work is licensed under a Creative Commons Attribution 4.0 International License.
