Marea azul estrellada pola oficialidá

  • 6 Maio, 2017

Nel 38 Díi de les Lletres miles d’asturianos tornaron a anubrir les cais d’Uviéu pa reivindicar coles sos asturines y les sos voces la Oficialidá del asturianu

Daqué tan básico como’l drechu a la propia llingua sigui siendo denegao al nuesu país. Pesi al reconocimientu internacional del asturianu como llingua por parte de la Unesco, ya mesmo’l reconocimientu internacional de llingua amenorgada con riesgu de desapaición, pesi a cuntar con un corpus lliterariu bayurosu con sieglos d’escritores y multitú d’escritores n’activu, pesi a la presión ciudadana que cada añu sal a glayar que ya, que queremos la oficialidá, siguimos na mesma situación d’indefensión que va cuarenta años.

[cycloneslider id=”xxxviii-dii-de-les-lletres”]

Un estatutu tresnocháu que naide con poder pa ello paez interesáu en camudar y una política de xeitos que busquen namás la semeya vacía en llugar de los fechos siguen siendo l’ancla que carez l’asturianu.

Afortunadamente somos un pueblu testerón y siguimos falando, siguimos escribiendo, y pese a quien pese siguimos glayando, siguimos defendiendo la Oficialidá, non como fin en si mesma, sinón como pasu primeru indispensable pa la recuperación y dignificación d’una llingua somorguiada por sieglos de represión y ataques direutos.

Por tou ello, miles d’asturianos tornaron a glayar ayeri peles cais d’Uviéu, colos rapacinos de Reciella (families pol asturianu) al frente, comu seña del futuru’l país. El percorríu, a traviés de la Cai Uría, dende la Estación de Renfe al Campuamor, duró daqué más d’una hora, pa finar como ya ye tradición col actu institucional de l’Academia de la llingua nel Teatru.

El discursu de la presidenta de l’ALLA, Ana Cano, sosprendió a munchos pola so suavidá, tres del añu d’ataques carecíos pol organismu que representa. Mencionó mui per alto una “xusta crítica al gobiernu” y “les polítiques invisibles nos sos llogros” anantes de pasar a cientrase nes dos cuestiones de mayor importancia a nivel lliterariu d’esti añu: la concesión del Premiu Nacional de Lliteratura a Xuan Bello y l’homenaxe qu’esti añu se fai pol Díi de les Lletres a les muyeres escritores asturianes.

L’actu finó con una prestosa actuación del grupu Muyeres, qu’interpretó maxistralmente una versión curtia del so trabayu “País Malva”, tres del que los asistentes presllaron el díi de la nuesa llingua con una espicha en Cualloto.

 

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies