El líder de La Francia Insumisa nun esclaria si va votar en blanco o a Macron

Cuatro díes dempués de la primer vuelta de les elecciones presidenciales na República de Francia, Jean-Luc Mélenchon pronúnciase al traviés d’un vídeu nel so canal de Youtube nel cual esplica que va acudir a les urnes el domingu 7 de mayu y que nun va votar pol Frente Nacional. Pero acullá del so refugu a la candidatura de Marine Le Pen amuésase ambiguu en rellación al sentíu del so votu, refugando dar una una conseña de votu a los sos más de 7 millones de votantes.

Respondió tamién a les numberoses crítiques d’esta selmana, que lu acusaben de favorecer al Frente Nacional. “Somos un movimientu políticu que nun tien nada que ver cola estrema derecha, hestórica, cultural y filosóficamente, tol mundu sabelo”, afirmó pa recordar dempués que s’enfrentó a Le Pen na rexón del norte cuando otros partíos la daban yá por perdida, y reivindicase amás como “l’únicu” que foi a guetar a los votantes del Frente Nacional. “Los que me dicen que tengo que dicir esto o aquello, ¡non!, nun tengo que facelo, lo que se nos pide nun ye un votu antifascista, ye un votu d’adhesión a Macron y non, nun nos xuntamos al so proyectu”.

This work is licensed under a Creative Commons Attribution 4.0 International License.