Vericuetos y Músiques ensin Prexuicios, dos programes de la emisora asturiana Radiu Kras, xunen les sos fuercies p’aconceyar nun mesmu conciertu trés de les propuestes musicales más suxerentes del panorama actual dientro’l soníu “folk”
Esti conciertu val tamién como preludiu a la cuarta edición del Vericuetos (Festival de Música brava), que va tener llugar en Xixón la siguiente fin de selmana (12-13 de mayu).
Con un discu y un premiu AMES al llombu (por esi trabayu discográficu) presentámosvos a Fabes de Mayu. Nacíes ente’l túnel de Arnao (Avilés), les praderíes Maliayes (Villaviciosa) y los campos de remolacha belgues, Fabes de Mayu ye una d’eses bandes folk capaces de producir ensimismamientu fondu y remembrar tierres de paraxes verdoses, secretos milenarios y criatures máxiques. Esta pequena familia de trovadores mudos, influyíos poles cestes vacíes de los acordionistes caleyeros ya’l fumu de les chimenees, van armaos con xilófonu, acurdión, contrabaxu y ukeleles.
Antón Menchaca, formación que cunta con un considerable númberu de bolos al recostines, consolidóse como una de les apuestes más orixinales y ventureres del panorama musical asturianu, y consiguió daqué que paecía bien difícil: abrir la tonada a nuevos espacios físicos y sonoros.
Finalmente, dende Galicia visítennos presentando’l so primer discu “Frutal Dead”, Trilitrate, que ye un proyeutu que toma música acústica y videocreación en tiempu real; tratase d’una composición coleutiva que tien como fin crear daqué personal ya inédito. Esta formación crea soníos desconocíos que desafíen cualisquier categoría y abren nuevos senderos na música acústica. Desdibuxen les llínies esistentes ente la composición y l’improvisación, revelando influencies d’estilos tan alloñaos ente si como pueden ser la música clásica, la improvisación llibre, el hardcore, el post-rock o’l noise. Interpreten amás música étnica orixinal dientro d’un universu propiu. Esta atmósfera completase por aciu estímulos visuales xeneraos en tiempu real.
Redaición InfoAsturies
This work is licensed under a Creative Commons Attribution 4.0 International License.
