El míticu chiringu de San Mateu foi creáu pola LCR y darréu xestionáu por diversos colectivos sociales

L’esfuerzu que rique’l so caltenimientu y la falta de voluntariáu mozo que sustituya a los veteranos, ente los qu’entá quedaben dellos de los fundadores, lleva a les asociaciones que lo xestionaben a decidir nun reabrilo en setiembre, dempués de munchos años na plaza de Riego y, nos caberos tiempos, instaláu frente a la Casa Conceyu.

Nun comunicáu los colectivos afirmen que se “cubrió un ciclu vital más que respetable” y que dexen “pasu pa que nuevos proyectos y asociaciones faigan les sos propuestes pa les fiestes”. Tamién manifiesten que “les costumes de la mocedá y la so manea d’implicase y participar nes fiestes camudó”.

Na barra del Topu Fartón taben la Xunta pola Defensa de la Llingua Asturiana, SOS Racismu y Xente Gai Ástur (Xega), pero’l so orixe ye mui anterior, atopándose nel branu del 1984 cuando dellos militantes de la Lliga Comunista Revolucionaria (LCR), organización trotskista, decidieron empecipiar esti proyectu.

This work is licensed under a Creative Commons Attribution 4.0 International License.