Recién espublizada la resolución  de la Conseyería de Desendolcu Rural y Recursos Naturales, pola que se dexen ensin efeutu los  311 acotamientos esistentes  al pastoréu vixentes por causa d’incendios, les quemes multiplíquense nos montes d’Asturies

Llucía Fernández Marqués

Los pirómanos “festexaron” con fueos la modificación de la Llei de Montes y Ordenación Forestal aprebada’l pasáu 24 de marzu na Xunta Xeneral que nos convierte nel únicu territoriu d’Europa nel que no s’acotarán al pastoréu les zones arrasaes por  incendios forestales. La midida afeuta a más de 300 acotamientos repartios en 36 conceyos, munchos de los que ya rexistraron quemes estos díes.

Esta situación da a los autores de los incendios la posibilidá d’ampliar les sos zones de pastoréu ensin esperes nin consecuencies. Recordemos que según los informes de la Fiscalía de Mediu Ambiente del Tribunal Superior de Xusticia d’Asturies  y según  los datos de les Brigaes d’Investigación d’Incendios del Principado cuasi el 80% de los fueos en nuesu país tan relacionaos, d’una u otra manera, cola rexeneración de pastos, batiéndose tolos los record de fueos prevocaos, según los informes de los téunicos forestales.

Les consecuencies d’estos incendios afeutennos a toos, atacando a la biodiversidá y el padremoñu natural del país, favoreciendo la erosión del suelu, empeorando la calidá del aire y poniendo en pelligru les vides de los vecinos y d’aquellos que trabayen para estinguir esos fueos.

This work is licensed under a Creative Commons Attribution 4.0 International License.