El Nalón va acoyer esti espectáculu, sorprendente, risonderu y cuasi máxicu, de baille y música flotante

Llucía Fernández Marqués

La Fola Flotante ye “Una pieza adautable” de música, teatru y danza que viaxa por paisaxes acuáticos de puertos, ríos, ríes, badees, llagos o charcos y que nesta ocasión va xalear el Nalón al so pasu per La Felguera, de la man de la Xata la Rifa, asociación d’artistes inquietos buscando siempres lo inesperao.

L’espectáculu defínese como “Un Teatru que tamién bailla, un llugar onde músiques, baillarinos, y distintos artistes con ganes de salir a flote, creen y tresformen un escenariu al aire llibre y sobre l’agua.”

La fola Flotante, nun ye un espectáculu, son munchos. Ye un esperimentu en direutu onde la Improvisación s’afae al mediu acuáticu enriba d’isles flotantes ya inestables, una metáfora en  movimientu del arte que muta de cutio col mediu.

Nun ye la primer vegada que podemos esfrutar d’esti espectáculu n’Asturies, yá actuaron nel Festival de la Ostra en Castropol y nel Arcu Atlánticu, en Xixón, pero non por velos yá va dexar de sosprender esti montaxe siempres distintu.

This work is licensed under a Creative Commons Attribution 4.0 International License.