El teatru uvieín acueye’l ciclu “Radar”

D’abril a mayu, dos díes a la selmana, a les 20h y con entrada llibre, nel Filarmónica van proyectase 25 películes d’autor procedentes de filmografíes tan estremaes como la coreana, la francesa o la polaca.

“Radar” empecipia’l viniente xueves, 6 d’abril, con La doncella, la última película del director Park Chan-wook, una producción inspirada na novela Fingersmith, de Sarah Waters, pero allugada na Corea baxo dominiu xaponés.

El ciclu va cuntar tamién cola presencia de dos realizadores que van caltener un alcuentru col públicu tres el pase de les sos películes: Ado Arrieta, que va tar el 13 d’abril con Belle dormant, y Nely Reguera, que va presentar el 28 de mayu a María (y los demás).

This work is licensed under a Creative Commons Attribution 4.0 International License.