El prósimu 7 d’abril Salomé Vilarroya inaugura en Xixón la so esposición pictórica ”Viesques  Mitolóxiques” ispirada nos paisaxes del nuesu país

Redaición InfoAsturies

La pintora percuerre cola so obra les viesques asturianes y descubre nelles los presonaxes que moren pente los árboles, ufriéndonos la so espectacular visión del nuesu país.

Les sos pintures al oleu son un espeyu de la bayura y fondura de la nuesa herencia mitolóxica, un percorríu pola natura y la maxa que gracies al so talentu podremos esfrutar ensin salir de la ciudá. Destaquen pol so usu de la lluz ya’l color, percorriendo cola so paleta tolos matices del verdi que podemos alcontrar nos paisaxes asturianos.

La esposición tará abierta al públicu de magar el 7 d’abril, n’Ecozentro (Cai Dindurra) y fasta’l 22 del mesmu mes.

This work is licensed under a Creative Commons Attribution 4.0 International License.