A menos d’una selmana de la manifestación motivada pola presencia de la selección del estáu opresor nel estadiu d’El Molinón, güei, 30 de marzu, los xixoneses tornen a sofitar públicamente al pueblu palestín nel so día de la Tierra
Llucía Fernández Marqués
Güei ye ‘al-Yaum al-Ard’, Díi de la Tierra, ya en Xixón va representase’l sofitu del pueblu asturianu al palestín al traviés una ufrienda floral ante’l olivu llantáu na plaza Sara Suarez Solís –Montevil- a les 13 hrs, a propuesta del CSCA y la Coordinadora asturiana d’ONGd.
La celebración d’esti Díi ye relativamente recién y remembra la fuelga xeneral protagonizada polos palestinos como protesta ante’l robu de les sos tierres y que terminó con siete muertos y numberosos mancaos a manes del exércitu sionista. A finales de marzu de 1976, los palestinos de Galilea decatáronse de que’l gobiernu sionista taba intentando confiscar 20.000 “dunums” de tierra agrícola palestina pa construyir asentamientos xudíos y un campu d’entrenamientu militar, asina que convocaron esta fuelga.
La fuelga xeneral solía ser entós la manera en que los trabayadores palestinos denunciaben les inxusticies negándose a dir al trabayu manifestándose nes cais llevando pancartes y canciando cantares de resistencia. Cuando se llamó a la fuelga xeneral el 30 de marzu de 1976, les marches y les manifestaciones asocediéronse perdayures, dende Galilea hasta’l desiertu de Negev. L’exércitu israelín y la policía respondieron a los manifestantes con violencia, y a la fin de la xornada docenes de palestinos cayeren mancaos y siete fueren asesinaos, disparaos poles armes sionistes. Esta fuelga foi tan importante porque tuvo llugar nel coral mesmu de Palestina, na tierra ocupada, y los palestinos que vivíen baxu constantes menacies d’espulsión de la so propia tierra fixeron frente a los ocupantes y denunciaron el robu siguíu de la so patria.
Dende entós el 30 de marzu ye’l Yaum al-Ard, el Día de la Tierra, una xornada en que los palestinos de tol mundu amuesen el so sofitu y unidá con aquellos que viven so la bandera d’Israel y so la ocupación israelina nos Territorios de Gaza y Cixordania, diendo a la fuelga o convocando manifestaciones y actos.
This work is licensed under a Creative Commons Attribution 4.0 International License.
