Col fin de bloquiar los túneles que comuniquen Gaza col mundu

El Ministeriu israelí de Defensa va empecipiar a construyir una muria soterraña de formigón alredor de la Franxa de Gaza nos vinientes trés meses. Nun ye nenguna idea nueva, de fechu yá se plantegaba nel 2014 con motivu de la guerra ente l’Estáu d’Israel y el movimientu Hamas.

El nomáu proyectu “Obstáculu”, consiste na construcción d’una muria a lo llargo de 65 kilómetros, dende’l Mar Mediterráneu nel norte de la Franxa hasta’l pasu de Kerem Shalom, nel sur y onde conflúin les fronteres d’Israel, Gaza y Exiptu.

La muria va costar a les arques públiques israelines unos 3.000 millones de shékels (810 millones de dólares o 769 millones d’euros), que hai que sumar a los 1.200 millones (324 millones de dólares o 308 millones d’euros) yá invertíos na gueta de soluciones tecnolóxiques pa la detección de los túneles soterraños que se construyeron pa romper l’aislamientu qu’Israel impunxo a la población palestina de la Franxa.

This work is licensed under a Creative Commons Attribution 4.0 International License.