Un estudiu de Raquel Alonso adelantra en cuatrocientos años l’apaición del mitu nacional

Una investigación espublizada na revista Journal of Medieval Iberian Studies pola profesora Raquel Alonso, de la Universidá d’Uviéu, col títulu de «L’orixe de les lleendes de la Cruz de los Ánxeles y la Cruz de la Victoria (catedral d’Uviéu): cruces gemmatæ al serviciu de la propaganda episcopal», apurre nuevos datos sobre’l mitu fundacional de la nación asturiana como Reinu cristianu.

La Cruz de la Victoria, xoya caltenida anguaño na Cámara Santa, foi donada a la Catedral d’Uviéu pol rei asturianu Alfonso III’l Magnu y la so esposa Ximena, nel añu 908, como oxetu destináu a la lliturxa. La lleenda de que Pelayo la llevaba consigo mientres la batalla contra los invasores islámicos surdiría darréu en función de los intereses políticos de la Ilesia asturiana.

Pensábase qu’esta lleenda xeneralizose nel sieglu XVI, pero’l nuevu estudiu la va asitiar cuatro siglos enantes en rellación a la oposición de la Ilesia asturiana, lliderada pol obispu Pelayo d’Uviéu (1101-1153), a integrase dientro de la Ilesia española baxo l’autoridá del antiguu arzobispáu visigodu de Toledo, apocayá lliberáu del dominiu islámicu. Esta resistencia a perder la so independencia orixinal (la sede episcopal uvieina ye de creación posterior a la invasión islámica) va espresase n’obres como’l Liber Testamentorum Ecclesiae Ouetensis y el Corpus pelagianum.

This work is licensed under a Creative Commons Attribution 4.0 International License.