Consideren que les acotadures al pastoréu sirven pa favorecer la recuperación de la vexetación, amenorgar la erosión y desincentivar les quemes
Redaición InfoAsturies
L’aumentu siguíu de les quemes, sobremanera los provocaos, a lo llargo de los años caberos, y bien especialmente nos últimos meses, con más de 250 quemes actives nuna mesma selmana, disparó l’alarma pente les organizaciones ecoloxistes asturianes.
El cambéu de la Llei de Montes asturiana, pindiu d’aprobación, cola que pretenden esaniciase les acotadures al pastoréu de les zones que carecieron una quema forestal, podría incentivar entá más les quemes provocaes, recordemos que la norma vixente prohibe la entrada dica que trascurra siquier un añu, p’asegurar asina la recuperación del terrén. El pastoréu ceo ya incontroláu en zones amburaes, cuando la vexetación nun cubrió la superficie, puede emprobecer la campera y ralentizar la so recuperación.
Por ello, la Coordinadora Ecoloxista d´Asturies, l´Asociación Asturiana d´ Amigos de la Naturaleza, Ecoloxistes en´Aición d´Asturies y SEO/BirdLife dirixieron un escritu al comité de siguimientu del Plan de Desenvolvimientu Rural (PDR) d’Asturies, solicitando que nun s’esanicie l’acotadura de terrenes tres una quema.
Tamién piden que se refuercen les midíes de control pa que nun se conceda nenguna ayuda a la esplotación de los terrenes que carecieron quemes forestales mientres un númberu d’años abondu, pa evitar que seya rentable amburar los nuesos montes y que tou terrén que se venceye a ayudes agraries cunte col informe del Serviciu de Montes del Principáu de nun sufrir quemes.
Coles mesmes soliciten que se revisen les ayudes concedíes n’años anteriores pa que se revoquen les que tean nesa situación o nun cumplan cualesquier otru aspeutu de les normes de la condicionalidad ambiental.
Nun hai qu’escaecer que les quemes forestales son consideraes un grave delitu nel Códigu Penal y que nel nuevu testu llegal aprobáu en 2015, son unu de los pocos delitos rellacionaos col mediu ambiente nel que s’aumentaron les penes
This work is licensed under a Creative Commons Attribution 4.0 International License.
