XEGA convoca un actu de protesta p’amosar la so repulsa a campañes d’odiu escontra les persones transesuales, como la del  autobús “Hazte Oir”

Desixen a les instituciones públiques, conceyos, Xunta Xeneral y Delegación del Gobiernu que faigan tou lo que tea na so man por que se retire la declaración d’utilidá pública a l’asociación “Hazte Oir” y a toes aquelles entidaes qu’afalen al odiu escontra llesbianes, gais, trans y bisesuales, de manera que les sos campañes d’odiu nun algamen los centros educativos, que les sos palabres denigrantes nun seyan espublizaes, que, en resume, los drechos de les persones LGTB+ nun sían afrellaos.

Ven imprescindible l’aprebación de la Llei Integral Trans en Asturies que llexisle de manera clara sobre’l derechu a la mesma identidá de toa persona, independientemente del so sesu biolóxicu, que protexa eficientemente a tolos ciudadanos de les agresiones y ofienses encontaes na intolerancia de dalgunos escontra lo que ye una opción personal, reconociendo esplícitamente toles realidaes y, por tantu toles persones.

Por tou esto faen un llamáu a toles persones, coleutivos, sindicatos y partíos políticos a concentrase’l miércoles, 22 de marzu, a les 19:30 hores na Plaza Mayor de Xixón sbaxo’l llema “Los xenitales nun marquen la to identidá”

This work is licensed under a Creative Commons Attribution 4.0 International License.