En nengún momentu ye considerada la posibilidá d’un referéndum

El miércoles 15 de febreru’l Parllamentu européu aprobó’l CETA, tratáu de llibre comerciu ente la Xunión Europea y Canadá, por 408 votos a favor, con 254 en contra y 33 astenciones. Esta votación supon la so inmediata entrada como norma de validez llegal, pero de manera provisional y condicionada, ya que ye necesariu que seya ratificáu polos Parllamentos de caún de los Estaos-Nación miembros de la Xunión Europea.

El Gobiernu central del Reinu d’España, presidíu por Mariano Rajoy, trabaya pa que’l tratáu llegue a les Cortes Xenerales nun curtiu periodu de tiempu; el testu, güei en manes del Ministeriu d’Esteriores, previsiblemente va llegar al Conseyu de Ministros nun mes.

Tras el Conseyu de Ministros, el tratáu va pasar a la Mesa del Congresu de los Diputaos -l’órganu de gobiernu de la cámara-, onde la mayoría de PP y Ciudadanos, dambos favorables al alcuerdu, garantiza que va ser tramitáu cola mayor rapidez posible.

La intención ye, aprovechando la posición favoratible al tratáu de PP, Ciudadanos, y tamién el PSOE, votalo y aprobalo tantu nel Congresu como nel Senáu enantes del branu.

This work is licensed under a Creative Commons Attribution 4.0 International License.