Les monedes inclúin la dictadura franquista dientro de los caberos “70 años de paz”
Les nueves monedes de la “Real Fábrica de Moneda y Timbre”, feches n’oru y plata, y con un valor de 10 y 200 euros, remembren nuna de les sos cares los caberos “70 años de paz”, en referencia al periodu de paz vivíu n’Europa dende’l final de la II Guerra Mundial.
Por embargu al tratase d’una moneda del Reinu d’España resulta polo menos chocante esta lleenda, yá que l’Estáu español nun se vio implicáu directamente naquella contienda bélica. Amás ye escaecíu’l fechu hestóricu de que a lo llargo de gran parte d’esos “70 años de paz” los pueblos del Estáu tuvieron sometíos a una dictadura militar por mor del desenllaz de la Guerra Civil Española de 1936-1939.
Tampoco pue escaecese que la lleenda ye mui asemeyada a ún de los esloganes propagandísticos qu’acuñó’l réxime franquista na so etapa final: los “25 años de paz”.
Joan Baldoví, diputáu de Compromís manifestó que considera que la edición d’estes monedes “ye un insultu a les persones que dieron la so vida na Guerra Civil pa defender el Gobiernu llegalmente escoyíu poles urnes de la II República y que dempués fueron escorríes demientres más de 35 años pola dictadura y represión franquista”.
This work is licensed under a Creative Commons Attribution 4.0 International License.
