La premier Nicola Sturgeon anunció que’l Parllamentu d’Edimburgo va empecipiar col procedimientu afayadizu pa convocar un nuevu referéndum d’independencia.

Nuna rueda de prensa ufiertada esta mañana en Bute House, la so residencia oficial, Nicola Sturgeon, la primer ministra del país, comunicó qu’Escocia va votar per segunda vegada pa decidir el so futuru, yá que tolos sos intentos de diálogu con Theresa May, la primer ministra británica, resultaron ser estériles.

La posibilidá d’una nueva convocatoria yera una opción non mui alloñada desque’l conxuntu de la ciudadanía británica decidió abandonar la Unión Europea, nun referéndum nel que la mayoría del pueblu escocés votó pola permanencia.

Va ser el mesmu Parllamentu escocés, de mayoría independentista, quien va decidir pa cuándo convocar el referéndum al traviés d’un procesu qu’arrinca la viniente selmana. Presuponse que verdes y nacionalistes van ponese d’alcuerdu pa esixir a Londes los poderes afayadizos pa convocar la consulta.

En 2014, la mayoría de los escoceses optó por siguir venceyaos políticamente a Londres, y l’enclín caltúvose nun 45-55% hasta apocayá. Pero precisamente Theresa May, coles sos intervenciones, foi quien favoreció un nuevu crecimientu del independentismu, que tres la cabera encuesta asitiábase casi al par: 48-52%.

This work is licensed under a Creative Commons Attribution 4.0 International License.