La fas d’alegaciones al proyeutu de  búsqueda d’hidrocarburos nel 3,5% del territoriu asturianu présllase cola declaración a la escontra de dellos ayuntamientos, muerganizaciones ecoloxistes y grupos políticos.

Tres de la solicitú d’Hunosa-xunto cola empresa Volta Energy Resources– el pasáu mes d’ochobre d’un  Permisu d’Investigación d’hidrocarburos,  abrióse un plazu de dos meses pa  presentar allegaciones a la escontra d’esti proyeutu. A la fin d’esti plazu, y tres de sentir la refuga de los asturianos al fracking, queda la duda de si’l Principáu decidirá aprebar o non esta solicitú. Esi nun sedrá, nin de lloñe’l caberu pasu: fasta agora tolos intentos chocaron coles barrieras qu’impón la X.E. en materia de seguridá y llimpieza anantes de dar el bon vistu a una esplotación d’esta triba.

En casu de tirar p’alantre y acordies la solicitú del permisu, Hunosa sedría l’operaor del proyeutu, qu’algamaría una estensión de 37.314 hectárees, alrodiu del 3,5% del territoriu asturianu,  afeutando a los conceyos de Sieru, Sariegu, Bimenes, Llaviana, Samartín del Rei Aureliu, Llangréu, Mieres, Al.ler, L.lena y Ribera d’Arriba. Cuasique la metá de los conceyos afeutaos pol proyeutu, bautizáu como Llábana-1 ya declararon la so refuga a abellugar istalaciones de fracking nel so territoriu, xuniendo la so voz  a la de coleutivos como la Coordinadora Ecoloxista d’Asturies o la Plataforma Asturiana Anti-fracking y a patios que, como Andecha Astur, lleva años alertando de la peligrosidá d’esta forma d’esplotación del subsuelu.

La oposición de la sociedá asturiana a esta téunica deriva de la so peligrosidá. El fracking supón asumir graves riesgos pa la salú ya’l mediu ambiente tanto nes fasteres direutamente afeutaes como pal conxuntu’l país. Pente les menacies destaca  contaminación y esgotamientu de los acuíferos y agües superficiales, el  xorrecimientu de movimientos sísmicos, contaminación de suelos y lliberación de compuestos químicos canceríxenos asociaos a la estración d’ hidrocarburos mediante la téunica de la frayaura hidráulica.

Más allá del impautu ambiental ye emportante destacar que, si bien los sos daños son permanentes, les esplotaciones por esti sistema avecen abandonase al cabu d’unos cinco años, por ser rentables namás a cortu plazu.

This work is licensed under a Creative Commons Attribution 4.0 International License.