Na tardi d’ayeri los participantes nel taller de llectura qu’entama’l Serviciu de Normalización Llingüística de la Comarca la Sidra, tuvieron la oportunidá de comentar la so obra con esta reconocía escritora asturiana

Esta cita enmárcase nel proyeutu  “Alcuentros col autor “ dientro’l plan de llectura n’asturianu, que consiste na entrega mensual d’un llibru d’un autor o autora pa la so llectura ya’l posterior alcuentru lliterariu colos mesmos al fin de mes, onde los llectores tienen la posibilidá de comentar col escritor los detalles de la obra, plantegando cualesquier dubia.

Estos talleres, que tienen l’envís d’afalar el vezu de la llectura en llingua asturiana y promocionar los nuesos autores,  son de baldre y van pasando ya por dellos conceyos ; ayeri tocó-y a Villaviciosa ser la sede d’esta prestosa idega.

Marta Morí  y la so obra de relatos Histories Familiares, espublizada nel 2009, foi la protagonista nesta ocasión. Seique esta escritora, investigaora y profesora ye más conocida pola so obra poética (Pórticu, El tiempu de la espera, La mio voz) y pol so trabayu investigador en crítica, historia lliteraria y didáctica de la llingua asturiana, nesti casu cientróse nel so volume de relatos, ya qu’estos yeren los que lleeren los participantes nel taller.

Ye la segunda vegada que La escritora xixonesa participa nos Alcuentros col Llector de la Comarca  la Sidra tres participar nos de Bimenes n’ochobre.

This work is licensed under a Creative Commons Attribution 4.0 International License.