La Universidá d’Uviéu vien a xunise a la cellebración del “Díe Internacional de la Muyer y la Neña na Ciencia”, convocáu pola Asamblea Xeneral de Naciones Xuníes.
L’Asamblea Xeneral de N.O proclama “…que les muyeres y les neñes desendolquen un papel fundamental nes comunidaes científiques y teunolóxiques y que la so participación debería reforzase; reconociendo tamién la importante contribución que fai la comunidá científica y teunolóxica al desendolcu caltenible y a la promoción del empoderamientu, la participación y apurres de les muyeres y les neñes na ciencia, la teunoloxía y l’anovación”.
A esti respeutu, la universidá punxo en marcha una iniciativa sol llema de “Yo soi científica”, cola que visibilicen y dan voz a 108 muyeres científiques que trabayen pa esta istitución a traviés de la so apaición n’estremaos banners na portada de la web institucional y l’espardimientu nes redes sociales d’una riestra de vídios onde les participantes van retrucando a delles entrugues.
Nos caberos años, el númberu de muyeres que trabayen na Universidá d’Uviéu foi medrando progresivamente, fasta’l puntu de que les muyeres suponen güei un 41,86% del equipu de gobiernu de la Universidá d’Uviéu.
De les 25 catedrátiques que componíen el 12’69% de la plantiya nel añu 2006 fasta les 71 actuales (un 25%) hai un trechu importante; pero entá queda un llargu camín por percorrer, frente a eses 71 muyeres tenemos 208 homes cubriendo puestos asemeyaos. Si echamos una güeyada al númberu de Profesores Titulares d’Universidá, pasóse d’un 37,16% a un 39%, y nel casu del profesoráu contratáu les muyeres pasaron de ser el 37% en 2006 al 46% en 2017.
Puede reparase que cuanto más relevante ye’l cargu, menor ye la proporción femenina, pero tamién se compreba qu’esto ye asina especialmente nos docentes de mayor edá yá que ente les incorporaciones más recién inviértese la proporción, de manera que’l porcentaxe de muyeres y homes ente venticinco y treinta año ye d’un 64% de muyeres frente a un 35% de varones.
This work is licensed under a Creative Commons Attribution 4.0 International License.
