A lo llargo de la tarde de güei un total de diez divulgadores científicos espondrán los sos conocimientos n’otros tantos monólogos humorísticos

L’ Asociación de Divulgación Científica d’Asturies en collaboración con  la Universidá d’Uviéu presenta un espectáculu fasta agora inéditu nel país: siguiendo la enraigonada tradición asturiana de los monologuistes, los cómico/científicos averarán a los asistentes a temes perestremaos n’intervenciones de malpenes diez minutos nes que tendrán el triple retu de sorprendelos, informalos y facelos reír.

L’espectáculu xune ciencia, humor y conocimientu d’estayes tan desemeyaes como la Bioloxía, la llingüística, la Química, la Medicina y la Xeoloxía, con entítulos mui suxerentes, como “Cannabinoides: d’okupes nel celebru”, “Un rayu de sol, oh, oh, oh” “Espediente Nansen” o “El tamañu… ¡claro qu’importa! nos animales marinos”

Esti eventu de divulgación científica, tendrá llugar de magar les siete y media nel Teatru Filarmónica, y contará con divulgadores científicos de la Universidá d’Uviéu, el Conseyu Superior d’Investigaciones Científiques o’l Institutu Español d’Oceanografía, que sedrán presentaos pol periodista Pachi Poncela.

This work is licensed under a Creative Commons Attribution 4.0 International License.