La organización amuesa’l so esmolecimientu de magar l’apaición de tolines muertes na costa asturiana y la sofita les reclamaciones dela Rede de Varamientos del Cepesma, agora inautiva por falta de fondos.

Demientres el mes de xineru, apaecieron más d’una docena de tolines muertes na costa asturiana. Dalgunes aportaron vives, pero nun había naide allí pa recibiles y atendeles. Los sos cuerpos permanecieron des, incluso selmanes, na playa, anantes de que les retiraren.

La llabor de recoyer, curiar y devolver a la mar cuando fore posible estos animales foi durante años una prioridá pa la Coordinadora pal Estudiu y Proteción de les Especies Marines (Cepesma),  qu’a traviés de la so Rede de Varamientos atendía y salvaba a los animales que quedaren varaos na costa.

Esta rede lleva cerca d’un añu inoperativa pola retirada de fondos del gobiernu del Principáu, polo que nesti intre la fauna marina ta desprotexía dafechu, ensin que furrule n’Asturies dalu cientru de recuperanza d’animales marinos, ensin que se cuente con presonal formáu nin medios afayaizos pa esta triba d’atención.

Andecha Astur, a traviés de los sos socios de coalición en Los Pueblos Deciden, EH Bildu, vien de reclamar al  Ministeriu español de Mediu Ambiente información sobre la situación real de la fauna marina asturiana y les medies que’l Ministeriu tien pensao aplicar nel ámbetu de les sos competencies, pa torgar la muerte de más mamíferos marinos na costa asturiano.

This work is licensed under a Creative Commons Attribution 4.0 International License.