Nun país nel que la lluvia (o regar les cais en so defeutu) ye la principal midía en casu d’emerxencia por contaminación nel aire, ye interesante tener conocencia de los que son los principales contaminantes presentes nel aire de bona parte de los conceyos asturianos, asina como de les sos consecuencies pa la salú y la relación pente los niveles máximos almitios y les midiciones feches
PM (Piqueñes partícules de Materia)
Formaes principalmente por compuestos inorgánicos -como silicatos y aluminatos, metales pesaos-, material orgánicu asociáu a partícules de carbonu y otros compuestos, sólidos o llíquidos, incluyendo los ácidos (tales como los nitratos y sulfatos), estes partícules considérense peligroses cuando’l so diámetru ye de 10 micrómetros o menos, ya qu’esi ye’l tamañu que yos permite pasar a traviés de les vies respiratories y entrar nos polmones. La esposición continua a les PM agrava’l riesgu de desendolcar cardiopatíes y neumopatíes, asina como cáncer de polmón. Ocho estaciones asturianes superen d’avezu les llendes másimes permitíes.
Les mayores (PM10) alcuéntrense nes prosimidaes de grandes carreteres ya industries. Les PM 2,5 (de menos de 2,5 micrómetros de diámetru) son les más pelligroses y fórmense cuando los gases emitíos por plantes d’enerxía, les industries y los automóviles reacionen nel aire.
la Organización Mundial de la Salú recomienda unos valores llende de 20 µg/m3 de midía anual pa les PM10 y un valor d’alerta con una media diaria de 50 µg/m3 y pa les PM 2,5 de 10 µg/m3 con llende d’alerta pa 25 µg/m3 nes 24 hores. Pa facese una idega del problema n’Asturies, la estación de Tremañes en Xixón caltién una media anual de 49 µg/m3, superándose’l nivel d’alerta 170 diís l’añu pasáu.
Ozonu a nivel del suelu :
Ta comprebá la relación direuta pente’l xorrecimientu de les midíes de les concentraciones d’ozonu al nivel del suelu y los ingresos hospitalarios por problemes respiratorios. Arriendes d’ello l’ozonu pue ocasionar depresión del sistema inmunolóxicu y efeutos sistémicos en muérganos blandos como’l fégado.
Reciella, presones con asma u otres enfermedaes de les víes respiratories, trabayaores nel esterior y amantes del esporte al aire llibre son los más vulnerables a los efeutos del ozonu “malu”, que nun s’emite direutamente al aire, sinón que ye consecuencia de reaciones químiques pente ósidos de nitróxenu (NOx) y compuestos orgánicos volátiles (COV) en presencia de lluz solar.
Sicasí, hai pocos datos sobro esti problema, ya que les estaciones de midición asturianes nun cuenten col equipamientu precisu pa llevar un control sobro’l nivel d’ozonu a ras de suelu.
Ósidos de nitróxenu: NOx
El grupu de gases altamente reactivos conocíos como “ósidos de nitróxenu (NOx) inclui’l diósidu de nitróxenu (NO2), el ácedu nitrosu y ácedu nítricu.
El más frecuente, NO2, formase de les emisiones de los automóviles, camiones, autobuses y aerosoles de nitratu, pero mui especialmente nes centrales elléutriques.
Arriendes de contribuir a la formación d’ozonu troposféricu y la contaminación por PM, el NO2 vencéyase por si mesmu con una riestra d’efeutos dañibles nel sistema respiratoriu.
El valor fixáu poles Direutrices de la OMS pa entamar a tomar midíes pa protexer a la población de los efeutos nocivos del NO2 ye de 40 µg/m3 (de media anual) y 200 μg/m3 de media en 1h. La estación de Corvera superó 132 diís esta norma y la de Gozón superó dellos diís les concentraciones qu’en ciudaes comu Madrid o París llevantaron pola mesma fecha l’alarma encarná.
Diósidu d’azufre: El diósidu d’azufre (SO2) ye parte d’un ensame de gases altamente reactivos conocíos como ósidos de sulfuru.
Les principales fontes d’emisiones de SO2 provienen de la combustión de combustibles fósiles nes centrales elléutriques (73%) y otres istalaciones industriales (20% ósidos d’azufre). Tamién emiten SO2 dellos procesos industriales, como la estración de metales a partir de minerales, y la quema de combustibles con altu conteníu d’azufre poles llocomotores y barcos grandes.
El SO2 se vencéyase con una riestra d’efeutos dañibles pal sistema respiratoriu. Pesi a la denuncia de que les estaciones tan allugaes estratéxicamente esquivando los puntos de mayor emisión, dalguna d’elles marcó fasta 76 diís niveles perriba la norma
Bencenu (C6H6,)
El bencenu ye un hidrocarburu poliinsaturáu que s’utiliza na manufactura d’otros productos químicos usaos pa la fabricación de resines, nylon, plásticos, pesticides, fibres sintétiques, gomes, deterxentes ya otros. Ye reconocíu como canceríxenu, ya que la esposición continua a elevaos niveles de bencenu nel aire, pue provocar lleucemia.
En dosis piqueñes el bencenu nel aire pue causar mareos, aceleración del baltíu del coral, dolores de tiesta, soñolencia, confusión, tremores y perda del conocimientu. Na sangre amenorga los glóbulos encarnaos, provocando tamién alteraciones na médula de los güesos. pue producir hemorraxes y daños nel sistema inmunitariu, aumentando asina les posibilidaes de contraer enfermedaes. En muyeres pue dar llugar a mestruaciones irregulares.
Per otru lláu, la so alta inflamabilidá fai medrar el riesgo d’incendios y españios.
Trubia ye’l llugar de la Península Ibérica que mayores concentraciones de fasta 77 µg/m3 y medíes diaries d’alrodiu los 20. Remembremos que la OMS alluga la llende almisible pal ser humanu en 5 µg/m3 de media. N’Avilés, otru de los conceyos más afeutaos por esta triba de contaminación denúnciase l’intencionáu allugamientu de los midiores llonxe de les fasteres más conflictives y en llugares especialmente llimpios polos vientos, lo que falsia enforma los resultaos que sicasí siguen siendo alarmantes.
Ante les presiones xeneraes pola población, el pasáu 12 de xineru Química del Nalón y Industries Doy (Trubia) caltuvieron un conceyu nel qu’estudiaron tomar midíes pa controlar la contaminación.
Pa finar, nun ta de más remembrar qu’estos contaminantes nun afeuten solamente al ser humanu, sinón que son igualmente dañibles pa la fauna asturiana
This work is licensed under a Creative Commons Attribution 4.0 International License.
6 Comments Already