Darréu entama una xornada d’alderique na que se falará de la situación de la llingua llionesa.

Anticipándose a la cellebración del Díe Internacional de la Llingua Materna -que ye’l 21 de febreru-, la Mocedá d’Izquierda Soberanista Darréu entama una Xornada Asturllionesa abierta al públicu que tendrá llugar nel Llar la Llegra, el vienres 17 de febreru.

La organización destaca que “Esti –el de la llingua materna- ye’l contestu nel que la mocedá asturiano tenemos muncho que reivindicar pa les nueses llingües propies. Esi mesmu tueru llingüísticu compartímoslu con países vecinos como’l llionés”

Na Xornada habrá ocasión de conocer más alrodiu de la situación sociollingüística nel País Llionés a traviés de la proyeición del documental “Llionés, la llingua llionesa”, y la posterior charra cientrada nel mesmu tema.

Al alderique acudirán como convidaes delles miembros de Ruchar, coleutivu xuvenil soberanista d’izquierdes llionés que tien esta cuestión ente les sos reivindicaciones. La intención d’esti alderique ye visibilizar les semeyances y desemeyances na situación d’Asturies y el País Llionés ya intercambiar esperiencies.

This work is licensed under a Creative Commons Attribution 4.0 International License.