Iniciativa pol Asturianu tuvo noticia de que’l Conceyu de Llaviana tien peslláu’l so Serviciu de Normalización Llingüística dende va tiempu, ensin qu’heba noticies de si va producise la so reapertura y cuándo podría volver a l’actividá. La organización esplicó nuna nota de prensa y una carta unviada al Alcalde les sos esixencies que pase porque l’equipu de gobiernu llocal “ponga los medios precisos pa que’l llabor del SNL vuelva a ponese en marcha y pa que tenga los recursos necesarios pal so llabor efectivu”.
Amás, dende la organización recuerden que’l Conceyu de Llaviana “tien paralizáu’l proyectu d’ordenanza de normalización del asturianu que cunta col acuerdu de tolos partidos y que se caltién a la espera de la decisión del grupu de gobiernu depués de más de diez meses de la so presentación en rexistru”.
Por ello, Iniciativa pol Asturianu amosó’l so descontentu colo que calificó de “llamentable situación de despreocupación pa col nuesu idioma”, recordando que’l Conceyu de Llaviana, “non solo nun dexa llevar alantre’l trabayu, sinon qu’incumple los compromisos electorales no tocante a la normalización”.
La organización reivindicativa solicitó que se reinicie l’actividá d’un serviciu “que taba faciendo un llabor importante nel Conceyu, asina como mayor implicación per parte del alcalde de Llaviana Adrián Barbón”. La entidá reafirmó “el so compromisu como la so collaboración pa iguar esta situación qu’afeuta direutamente a los drechos de toos y toes”.
This work is licensed under a Creative Commons Attribution 4.0 International License.
