Iniciativa pol Asturtianu solicita que los topónimos oficializaos apaezan nos nuevos cartelos  de la operadora ferroviaria n’Asturies

La principal operadora ferroviaria d’España, RENFE/FEVE, ta instalando nuevos cartelos nes estaciones d’Asturies. Nesti cambéu les llingues utilizaes fueron el castellán y el inglés, escaciendo dafechamente la llingua propia de la nuesa comunidá, acordies colo que denunció Iniciativa pol Asturianu, que quixo amosar “el so descontentu con esta situación de marxinación pal col nuesu idioma. Puesto que, la rede de ferrocarriles, non solo nun lo utiliza nes informaciones, sinon qu’incumple la normativa vixente no tocante a la toponimia de les propies estaciones”.

Dende la organización reivindicativa recuerden la Llei d’Usu del asturianu, concretamente el capítulu V de la mesma, onde se diz lliteralmente que: “Los topónimos de la Comunidá Autónoma del Principáu d’Asturies han tener el nome oficial na so forma tradicional”. Polo qu’aprovechen pa reclamar “que’l gobiernu asturianu informe y faiga cumplir la llei a les alministraciones comunitaries”.

Recuerden tamién “que los topónimos de la nuesa comunidá gocien d’un marcu d’oficialidá, lo que fai que la sociedá civil asturiana tea en condiciones d’esixir que se cumpla la llei o, lo que ye lo mesmo, los drechos de los asturianos”. Nesti sen, Iniciativa Pol Asturianu anuncia que va denuncia esta situación, al empar qu’ufierta la so collaboración pa guiar a la compañía nestos cambeos.

This work is licensed under a Creative Commons Attribution 4.0 International License.