L’ausencia de proyeutos asturianos presentaos al programa comunitariu d’infracadarmes “Coneutar Europa” , otra oportunidá perdía pal nuesu país.

El Mecanismu Coneutar Europa ta pensáu pa permitir la preparación y desendolcu de proyeutos d’ interés común nes estayes del tresporte, les telecomunicaciones y la enerxía. En particular, el MCE sofitará la execución de los proyeutos d’interés común empobinaos a la costrución y meyores d’infracadarmes y servicios nueos nestes tres estayes.

Arriendes d’ello sofitará proyeutos con valor añadíu europeo y ventaxes sociales significatives, que nun algamen financiación abonda del mercáu. Una oportunidá emportante p’ameyorar les nueses infracadarmes que nun paez tar aprofitándose

La organización política Andecha Astur vien de presentar énte’l Senáu una riestra d’entrugues pa esclariar la situación d’estos fondos, ya que, tal como denuncien, nun se conoz la información sobre proyeutos asturianos presentaos a esti programa.

Según pallabres d’Arturu Xosé Bermeyu, Secretariu xeneral d’A.A “Esto ye un fechu  esmoleceor, qu’evidencia la incomunicación a la que l’Estáu español somete a Asturies.” Ye más, recalca Arturu “fálase del “AVE del Cantábricu” pero desconozse si ensiquiera esiste esi proyeutu y munchu menos si cunta con daqué presupuestu que lu faiga vidable.”

Pente les entrugues treslladaes al Senáu tamién ta’l posible sofitu al proyeutu d’un correor ferroviariu que coneute los grandes puertos de la cornisa cantábrica

This work is licensed under a Creative Commons Attribution 4.0 International License.