El 95% de la población asturiana respira un aire perxudicial pa la salú.
Acordies la OMS (Muerganización mundial de la Salú) la contaminación del aire representa un importante riesgu pa la salú. Mediante la disminución de los niveles de contaminación del aire los países pueden amenorgar la incidencia d’acidentes cerebrovasculares, cánceres de polmón y neumopatíes cróniques y agudes, pente elles l’asma, asina comu les muertes asociaes a les mesmes. La contaminación del aire ye un asuntu de la másima gravedá: el Programa por un Aire Llimpiu n’Europa cifra’l númberu de muertes prematures anuales por esta causa en 400.000 na Xunión Europea. Más de mil n’Asturies.
Sicasí, llevamos décades careciendo un de los aires más puercos a nivel européu, ensin que los responsables políticos tomen les medies afayaices pa torgalo. El 93% de la población asturiana respira un aire perxudicial pa la salú y los costes sanitarios derivaos de la contaminación atmosférica representen al menos 640 millones d’euros al añu n’Asturies (datos de la OMS y la OCDE).
Son abondos los colleutivos que vienen denunciando esta situación: Ecoloxistes n’Aición d’Asturies informaba ya nel 2.003 de que “Supérense les llendes de contaminación en toles estaciones de la Rede Automática” y nel 2.015 Andecha Astur llegó a llevar el tema ante la comisión del parllamentu européu. Anguañu, la Coordinaora Ecoloxista d’Asturies y -en Xixón- la Plataforma contra la Contaminación son dos de los coleutivos más implicaos, ensin que toles revindicaciones tuvieren malpenes repercusión mediática fasta que la escasez de lluvia (derivada precisamente del cambeu climáticu xeneráu a la so vez pola contaminación) fizo imposible siguir escondiendo’l problema.
Los hospitales saturaos d’enfermos respiratorios, especialmente nes unidaes d’infantil, son una voz d’alarma difícil de desdexar. El presidente de l’Asociación de Pacientes con Patoloxía Respiratoria del Principáu d’Asturies y de la Federación Nacional d’Asociaciones de Enfermedaes Respiratories (Fenaer), Javier Palicio, reclamó hai pocu la puesta en marcha de medies “reales” que vaigan más allá de regar les cais. Los datos sol xorrecimientu de los casos de cáncanu de polmón n’Asturies son direutamente allarmantes.
Les declaraciones de la Conseyera de Mediu Ambiente, Belén Fernández, nes que recomienda que los ciudadanos s’enfoten en prender poco la calefacción y usar más el tresporte públicu, son comentaes pola Coordinadora Ecoloxista d’Asturies d’una mena enforma gráfica:“Ye como si dixera que pa torgar qu’haiga mierda nes cais, en llugar de costruyir redes d’alcantarilláu publiques, los ciudadanos debiéremos facer por dir poco al bañu”.
N’Asturies seguemos siendo’l puntu prietu de la Península Ibérica, col nivel más altu de contaminación de benceno (Uviéu) y partícules PM10 (8 de les estaciones superen les llendes estatales de pelligrosidá, muncho más tolerantes que les recomendaes pola OMS). Contamos igualmente cola mayor emisión de C02 por habitante y con emisiones de SO2 que, pesi a la estratéxica situación de les estaciones mediores públiques, cuntaron 76 díes perriba de lo aceutable, lo mesmo que les de NOx, con 132 midiciones fuera de norma.
Otra de les denuncies más xeneralizaes ye la de la ocultación y falsiamientu de datos por parte de l’alministración pública, ya que namás que se tienen en cuenta los datos de les 22 estaciones públiques, desdexando les 43 estaciones privaes, quicias non tan estratéxicamente allugaes pa esquivar la contaminación. Arriendes d’ello, nun ye estraño que falten d’avezu los datos de les estaciones más conflictives, como les de Salinas y Raices, que lleven tiempu ensin datos tres d’una medición especialmente negativa, y les dos del Puertu del Musel, que nun tienen n’abierto los datos, pesi a la obligación de tresparencia que tienen tolos muerganismos públicos.
Pa más información so los efeutos so la salú de los contaminantes presentes en nuesu aire, lleer “Piqueña Guía de contaminantes atmosféricos”.
This work is licensed under a Creative Commons Attribution 4.0 International License.
