La primer ministra d’Escocia realizó un llamamientu al diálogu nel conflictu nacional catalán
Nicola Sturgeon plantegó aplazar el nuevu referéndum d’independencia d’Escocia hasta que Gran Bretaña abandone la Unión Europa.
El Partíu Nacionalista Escocés (SNP), de Sturgeon, reclamó esti branu la convocatoria d’un nuevu referéndum pero ensin esclariar unos plazos concretos. “Nun voi da-y mayor importancia a los plazos hasta que’l Brexit y los términos del Brexit tean más nidios. Hasta que tengamos un horizonte nidiu de lo que significa tou esto pa Escocia”, esplicó Sturgeon nuna entrevista cola BBC. Tamién manifestó que sería “un actu de babayada monumental pal Reinu Uníu salise del mercáu únicu”.
En rellación a Cataluña, Sturgeon nun quier antemanar la so posición énte una posible declaración unillateral d’independencia, señalando que “nun voi especular sobro lo que va asoceder en Cataluña enantes de qu’asoceda. Nun ta baxo’l mio control. Nun soi yo quien tien de decidir cuál ye’l meyor futuru pa Cataluña”. Pero si realizó un nuevu llamamientu al diálogu, manifestando que “pienso que ye’l momentu de que’l diálogu sustituya a la confrontación (…). Nun puedes dicir que’l derechu de la xente a decidir el so futuru ye illegal en toa circunstancia”.
This work is licensed under a Creative Commons Attribution 4.0 International License.