La banda de mecigayu ska prepara una nueva temporada col aval de más de dos décades de trayectoria. Les cites d’esti añu n’Urbiés, Zarréu y Ciares acompañaron el llanzamientu de «L’alcordanza encesa», una nueva muestra del so amiestu de folixa, memoria y compromisu.

La Tarrancha yá tien abierta la contratación pa 2027. El grupu asturianu prepara l’axenda del añu viniente con una propuesta que lleva más de venti años faciendo baillar al públicu ensin renunciar a la llingua nin al mensaxe social. El cartelu de la nueva campaña resume esa identidá: «Mecigayu Ska from Asturies», un amiestu de ska, punk, folk, soníos balcánicos, swing, ragga y funk.

Dende la so nacencia en 2003, la formación foi construyendo un soníu propiu de magar los ritmos xamaicanos y de la llibertá pa mecese con otres músiques. L’asturianu, l’humor, la ironía y la crítica social formen parte d’esa manera d’entender los cantares, pensada pa provocar reflexón al tiempu que convida al baille.

Esi camín dexó trabayos como Ö-3-3, Mezigayuska, Mezillingües, Elefantes na cacía y Baillando con llokes. Una discografía na que la esperimentación y les collaboraciones acompañen una personalidá reconocible. En 2024 llegó Camín de Venti, un discu en directo con quince cantares grabaos nel Teatru Vital Aza de L.lena y la participación de músicos convidaos. El trabayu recoyó una de les principales cartes de presentación de La Tarrancha: la so rellación col públicu enriba d’un escenariu.

La carretera volvió tener protagonismu en 2026. En xunu, la banda formó parte del XXX Certame del Quesu d’Urbiés, con una actuación programada na sesión vermú del sábadu 6. Una cita que xunió música en directo, cultura popular y un productu estrechamente venceyáu al territoriu.

En xunetu, La Tarrancha integró’l cartelu del Zarréu Fest, celebráu del 3 al 5 en Degaña. Compartió programación con propuestes como Felpeyu, Alienda, Otramiente y Süne, nun festival de baldre y venceyáu a la vida cultural del suroccidente asturianu.

La ruta del branu incluyó tamién la Romería de Ciares, nel campu de fútbol de La Cruz, en Xixón. La presencia del grupu nesta programación, xunto a Guieldu, Rollu Folk y les Pandereteres de Ciares, encaxa nuna trayectoria próxima a les fiestes populares y a los espacios que dan protagonismu a la música n’asturianu.

Pero 2026 tamién traxo música nueva. En mayu estrenóse «L’alcordanza encesa», un cantar que lleva al terrén del punk y del ska la memoria de les persones queríes que yá nun tán y de quienes dexaron buelga na llucha social. Grabáu nos Tutu Estudios de Corvera, cola producción de Sergio Rodríguez, el tema llegó acompañáu d’un videoclip de Leti Cienfuegos nel que participaron imáxenes apurríes pola banda y pola so redolada.

Con esi bagaxe, La Tarrancha abre una nueva temporada pa siguir llevando’l so mecigayu a escenarios, festivales y fiestes. Les entidaes y organizaciones interesaes en contratar al grupu pa 2027 pueden contactar nel teléfonu 686 55 92 90 o nel corréu latarrancha@hotmail.com.

This work is licensed under a Creative Commons Attribution 4.0 International License.