La falta de personal nes residencies asturianes ye una necesidá que podía prevese, lo mesmo que la importancia de financiar los curiaos, formar profesionales y ofrecer condiciones llaborales que permitan retenelos. Por contra, los números clausus na formación sanitaria y la privatización de los servicios caminen nel otru sen

L’avieyamientu de la población asturiana nun ye una sorpresa. Por eso, les dificultaes de les residencies pa contratar personal nun pueden tratase como una emerxencia imprevisible. La necesidá de más cuidaos podía anticipase. Lo que fai falta ye una planificación política capaz de tresformar esa previsión en profesionales, servicios y recursos.

El cálculu de profesionales necesarios pa cubrir la demanda actual -xorreciente- ta nos 12.000 emplegaos. Según les cifres recoyíes, les residencies asturianes empleguen alredor de 6.000 persones, unes 2.500 d’elles nel organismu públicu Establecimientos Residenciales para Ancianos de Asturies (ERA). El restu, unes 3.500, trabaya nel sector priváu. La rede cuenta con 249 centros y unes 13.000 places, con ocupación completa y una llista d’espera oficial que supera les 3.000 persones.

Lloñe d’esperase que se cubran eses places, les empreses menacien con amenorgales, alertando de problemes pa cubrir vacantes y plantegando posibles preslles de plantes y servicios. El sector priváu escúdase nesa falta de profesionales pa desixir l’aumentu del pagu públicu por plaza concertada. Los sindicatos apunten a los salarios baxos y les xornaes llargues como factores que dificulten atraer y retener personal.

Curiar a persones dependientes implica responsabilidá, esfuerciu físicu y carga emocional. Esa responsabilidá tien que reconocese nel sueldu, nos descansos, na estabilidá y nel númberu de profesionales disponibles en cada turnu.

Hai otra contradicción que merez revisión: nun ye de recibu reclamar personal sociosanitariu mientres se caltienen llendes d’accesu a los estudios que formen parte d’esos profesionales. La Universidá d’Uviéu tien llende de places nos estudios sanitarios, con descomanaes dificultades p’acceder a esos estudios. Ante les necesidaes asistenciales, procede revisar si la oferta formativa ye abonda.

Les residencies precisen enfermería, pero tamién personal auxiliar, xerocultor y otres especialidaes con itinerarios de Formación Profesional y acreditación propios. Ampliar la formación esixe profesoráu, práctiques y financiación; formar más xente meyoraría la facilidá pa topar personal, pero tampoco va resolver la escasez si dempués les condiciones llaborales espulsen a los profesionales haza otros territorios con meyores contratos.

Asturies precisa una estratexa de curiaos con previsiones de demanda, oxetivos de contratación y presupuestos sosteníos. Ye un problema abordable, pero les decisiones tienen plazos: formar y consolidar una plantía lleva años. La necesidá yera previsible dende va décades.

This work is licensed under a Creative Commons Attribution 4.0 International License.